बाँके (डुडुवा) : 'जेन-जी'ले गरेको आन्दोलनका क्रममा उत्पन्न परिस्थितिले बाँके डुडुवा गाउँपालिकाको कामकाजमा असहज स्थिति सिर्जना भएको छ । उत्पन्न असहज परिस्थितीका कारण अहिले कार्यालयको सम्पुर्ण सेवा प्रभावित भएको छ । पालिकाका जनप्रतिनिधीहरुले शुक्रबार सयुक्त विज्ञप्ति जारी गर्दै जेनजीको नाममा केही उच्छृंखल समूह पालिकाभित्र प्रवेश गरि प्रमुख प्रशासकीय अधिकृत अशोक कुमार पाण्डेयमाथि कुटपिट र दुव्र्यवहारको घटनाप्रति गम्भिर आपत्ती जनाएको छ ।
भदौ २५ गते राती करिब साढे ८ बजेको समयमा ८–१० जनाको समूह कार्यालयमा तोडफोड गरी कार्यालयको कागजात आगजनी गरेको विज्ञप्तिमा भनिएको छ । ‘२६ गते फेरी अर्को समूह कार्यालयमा प्रवेश गरि प्रमुख प्रशासकीय अधिकृत पाण्डेयमाथी कुटपिट तथा दुव्र्यवहार भएको छ । दुखद यो घटनाप्रति हाम्रो गम्भिर ध्यानाकर्षण भएको छ,’ विज्ञप्तीमा उल्लेख छ ।
पुर्वप्रदेश मन्त्री तथा प्रदेश सभा सदस्य भण्डारीलाल यादव र पुर्व प्रदेश मन्त्री विजयबहादुर यादवको नेतृत्वमा करिब ३०–३२ जनाको समुहले कार्यालयमा प्रवेश गरि कुटपिट गरेको पालिकाले विज्ञप्तिमा उल्लेख गरेको छ । उक्त समुहले जर्बजस्ती कार्यालयको भान्सा कोठामा पसी बोरीभित्र मदिराका बोतल बाहिर ल्याएर सामाजिक सञ्जालमा फोटो र भिडियो भाइरल बनाएकोप्रति समेत पालिकाले गम्भीर ध्यानाकर्षण गराएको छ ।
विज्ञप्तिमा भनिएको छ, ‘पालिकालाई अनावश्यक रुपमा बदनाम गरेको घटना दुःखद रहेको छ । आन्दोलनको नाममा घुसपैठ गरी विपक्षी समुहले पालिकालाई बदनाम गर्ने गरि अतिरञ्जित कार्य गरेको हो ।’ पालिका अध्यक्ष नरेन्द्रकुमार चौधरी, उपाध्यक्ष शाहिदा बानो, वडा अध्यक्षहरु पटेश्वर कुर्मी, दुर्गा प्रसाद बर्मा, आमोद कुमार तिवारी, सगिर खाँ, वडा सदस्य राधेश्याम मौर्यलगायत कार्यपालिका सदस्यद्धारा सयुंक्त रुपमा जारी विज्ञप्तीमा उहाँहरुले कुन हैसियत र कानुनले जबरजस्ती कार्यालयमा ताला खोलेरे अनावश्यक रुपमा बदनाम गर्ने नियतका साथ गरेको भ्रामक प्रचारबाजीको कार्य खेदजनक रहेको उल्लेख छ ।
समुहले कार्यालयमा ताला लगाएकोले अहिले हानी नोक्सानी बारे एकिन जानकारी नभएको अवस्था रहेको छ । स्थानीय प्रशासनसंग जनप्रतिनिधी र कर्मचारीको सुरक्षाको माग गर्दै हालसम्म कार्यालयको सम्पुर्ण सेवा अवरुद्ध रहेको अवस्थालाई तत्काल सहज रुपमा सुचारु गर्ने वाताबरण बनाउन पालिकाले सबै सरोकारवाला निकायलाई अपिल गरेको छ ।
