जेनजी आन्दोलनमा मोटरसाइकल जलाईदिएका शर्माले तिरे डेढ लाख

समाज

Home
समाज
जेनजी आन्दोलनमा मोटरसाइकल जलाईदिएका शर्माले तिरे डेढ लाख

जेनजी आन्दोलनमा मोटरसाइकल जलाईदिएका शर्माले तिरे डेढ लाख

तुलसीपुर : जेनजी आन्दोलनका क्रममा व्यक्तिगत मोटरसाइकलमा आगजनी गर्ने एक जनाले गल्ती स्वीकार गर्दै डेढ लाख रुपैयाँ तिरेका छन् । तुलसीपुर बस्ने २६ वर्षीय सञ्जय शर्माले पीडितलाई डेढ लाख रुपैयाँ नगद तिरेका हुन् ।

रूकुम पश्चिमको चौरजहारी नगरपालिका वडा नम्बर १३ का उनी भदौ २४ गते भएको प्रदर्शनमा सहभागी भएका थिए । त्यसक्रममा उनले तुलसीपुर निवासी केशवराज भुसालको मोटरसाइकलमा आगजनी गरेका थिए । भुसाल नेपाली कांग्रेस निकट नेपाल तरूण दलका तुलसीपुर नगर उपसभापति हुन् । उनको बा ८१ प ९३९६ नम्बरको मोटरसाईकलमा आगजनी भएको थियो ।

भुसालले आफ्नो मोटरसाइकल तुलसीपुर उपमहानगरपालिकाको प्रशासनिक भवनको अन्डर ग्राउन्डमा पार्किङ गरेर राखेका थिए । आफ्नो मोटरसाइकल जलेपछि भुसालले सिसिटिभी फुटेज र नगर प्रहरीसँगको सहकार्यबाट उक्त आगजनीमा पाँच जना संलग्न रहेको पत्ता लगाए । खोजी क्रममा शर्मालाई फेला पारेपछि भुसालले क्षतिपूर्ति माग गरेका थिए । सञ्जयविरूद्ध किटानी जाहेरी दिने तयारी गरेपछि आफ्नो भागमा पर्ने क्षतिपूर्ति दिन सहमत भएका हुन् ।

गल्ती स्वीकार गर्दै सञ्जयले भुसाललाई डेढ लाख क्षतिपूर्ति दिने सहमतिपछि दुवै पक्षबीच लेखापढी भएको थियो । पेसाले तुलसीपुरमा विद्युत वाइरिङ गर्ने सञ्जयले अन्ततः पीडितलाई नगद डेढ लाख बुझाए । त्यसपछि कानुन व्यवसायी उपस्थितिमा भुसालले सही–छापसहित मेलमिलापको कागज बनाए । सहमति पत्रअनुसार अबदेखि भुसालले सञ्जय विरूद्ध कुनै किटानी जाहेरी वा उजुरी नदिने सहमति भएको छ ।

प्रकाशित मिति: शुक्रबार, असोज १०, २०८२ १६:००

प्रतिक्रिया दिनुहोस्