होटल सिटी प्यालेसमा जब सुरु भयो, ‘नेपालगन्ज सांस्कृतिक सन्ध्या’

विशेष

Home
विशेष
होटल सिटी प्यालेसमा जब सुरु भयो, ‘नेपालगन्ज सांस्कृतिक सन्ध्या’

होटल सिटी प्यालेसमा जब सुरु भयो, ‘नेपालगन्ज सांस्कृतिक सन्ध्या’

नेपालगन्ज : नेपालगन्जको धम्बोझीमा रहेको ‘चारतारे’ होटल सिटी प्यालेसमा शुक्रबार बेलुका बेग्लै रौनकता छायो । तिहारको पुर्वसन्ध्यामा विभिन्न साँस्कृतिक भेषभुषामा सजिएका कलाकारले थरीथरीका नेपाली मौलिक नृत्यहरु प्रस्तुत गरे । कलाकारको प्रस्तुतीले त्यहाँ उपस्थित भएका सबैलाई आर्कषण गर्यो ।

नृत्य अवलोकन गर्न नेपालगन्जका विभिन्न क्षेत्रबाट प्रतिनिधित्व भएको थियो । नेपाली मौलिक कला संस्कृति संरक्षण गर्ने उद्देश्यका साथ होटल सिटी प्यालेसले ‘नेपालगन्ज सांस्कृतिक सन्ध्या’ कार्यक्रम आयोजना गरेको हो ।

होटल सञ्चालक लोकेन्द्र अर्यालले नेपाली मौलिक कला संस्कृति संरक्षण गर्ने उद्धेश्यले सांस्कृतिक कार्यक्रम गरिएको जानकारी दिए । ‘यो नितान्त नेपाली मौलिक कला संस्कृति संरक्षण गर्ने उद्देश्यले गरिएको कार्यक्रम हो, पहिलो दिनको कार्यक्रमबाट राम्रा प्रतिक्रियाहरु आएका छन्,’ सञ्चालक अर्यालले भने ।

सांस्कृतिक कार्यक्रमको संयोजन गरेका नाट्टा बाँके च्याप्टरका निर्वतमान अध्यक्ष एवम् पर्यटन क्षेत्रका अगुवा श्रीराम सिग्देलले नेपालगन्जमा नेपाली मौलिक कला संस्कृति झल्किने गरी गरिएको यो कार्यक्रम नितान्त नौलो रहेको बताए ।
‘नेपाली मौलिक कला संस्कृति लोप हुदै गइरहेका बेला यो कार्यक्रमले थोरै भएपनि हाम्रा संस्कृति संरक्षणमा मद्धत गर्नेछ,’ सिग्देलले भने, ‘नेपालगन्ज शहरभन्दा टाढा गएर नेपाली मौलिक कला संस्कृति हेर्न र नेपाली परिकारहरु खान रुचाउने पाहुनाहरुका लागि आफ्नै क्षेत्रमा यस्तो कार्यक्रम देख्न पाउनु महत्वपूर्ण अवसर पनि हो ।’

सुदुरपश्चिमको लोकप्रिय मानिने ‘देउडा नृत्य’ बाट सुरु गरिएको प्रस्तुतीका क्रममा मारुनी लगायत दर्जनौं नृत्य प्रस्तुत गरिएको थियो, भने कार्यक्रमको अन्त्यमा देउसी भैलो खेलेर समापन गरिएको थियो । उक्त कार्यक्रमको उद्घोषण तिलक गाउँलेले गरेका थिए ।