अर्घाखाँची : अर्घाखाँचीको पाणिनी गाउँपालिका-८ दुर्गाफाँट कुडुलेमा बस दुर्घटना हुँदा चार जनाको मृत्यु भएको छ। सुपा देउराली मन्दिर दर्शन गरेर फर्कने क्रममा भएको उक्त दुर्घटनामा अन्य २६ जना घाइते भएका छन्।
जिल्ला प्रहरी कार्यालय अर्घाखाँचीका अनुसार दुई जनाको घटनास्थलमै र अन्य दुई जनाको उपचारका क्रममा अस्पतालमा मृत्यु भएको हो । मृत्यु हुनेमध्ये कास्की–१९ की ७८ वर्षीया राममाया बस्नेतको पहिचान खुलेको छ ।
बस्नेतको जिल्ला अस्पताल अर्घाखाँचीमा उपचारका क्रममा मृत्यु भएको स्वास्थ्यकर्मी अशोक चौहानले जानकारी दिए। अन्य तीन मृतकको भने पहिचान खुल्न बाँकी रहेको प्रहरीले जनाएको छ ।
पर्वतबाट सुपा देउराली दर्शनका लागि आएको ग १ ख ५०४ नम्बरको बस फर्कने क्रममा कुडुलेमा दुर्घटनाग्रस्त भएको हो । दुर्घटनामा घाइते भएका २६ जनामध्ये २० जनालाई थप उपचारका लागि पाल्पा र ६ जनाको अर्घाखाँची अस्पतालमा उपचार भइरहेको छ ।
जिल्ला प्रहरी कार्यालय अर्घाखाँचीका प्रमुख प्रहरी नायब उपरीक्षक दिवसबहादुर जिसीले दुर्घटनाका घाइतेहरूको उद्धार गरी अस्पताल पठाउने काम भइरहेको जानकारी दिए।
‘दुई जनाको घटनास्थलमै र दुई जनाको अस्पतालमा मृत्यु भएको पुष्टि भएको छ,’ उनले भने, ‘अहिले पनि उद्धार कार्य जारी रहेकाले घटनाको थप विवरण आउन केही समय लाग्नेछ ।’ प्रहरीका अनुसार बस सडकबाट तल खसेको थियो ।
घटनालगत्तै स्थानीय र सुरक्षाकर्मीको टोली उद्धारमा खटिएका थिए । दुर्घटनाको कारण र अन्य मृतकको पहिचान खुलाउने प्रयास भइरहेको प्रहरीले जनाएको छ।
