नेपालगन्ज : नेपालगन्ज उपमहानगरपालिका क्षेत्रमा फुटपात अतिक्रमण गर्ने क्रम बढेको छ । फुटपात अतिक्रमण बढ्दै जादाँ उपमहानगर क्षेत्रमा ट्राफिक ब्यवस्थापन गर्न समेत समस्या भएको छ । नेपालगन्ज उपमहानगरपालिकाको सबैभन्दा ब्यस्त रहने सदरलाईन, घरबारीटोल, न्युरोड, त्रिवेणी मोड, त्रिभुवन चोक, धम्बोझी, कारकाँदो, फुलटेक्रा, भेरी अस्पताल रोड लगायत स्थानमा फुटपात अतिक्रमण बढेको हो ।
ब्यापारीले फुटपातमा अतिक्रमण गरेर बिक्रीका लागि सामान राख्ने गरेका छन् । ‘जताततै ब्यापारीले फुटपात अतिक्रमण गरेका छन्, हटाउन खोज्दा उल्टै प्रतिवाद गर्न खोज्छन्,’ उपमहानगरपालिकाका एक कर्मचारीले भने । फुटपात अतिक्रमण खाली गराउन उपमहानगरका जनप्रतिनिधी समेत अन्यौलमा परेका छन् । त्यसका लागि सर्बपक्षिय र सर्बपक्षिय सहमतीको पर्खाइमा जनप्रतिनिधी देखिन्छन् ।
अतिक्रमणमा परेका फुटपात खाली गराउने उपमहानगरपालिकाको पटक पटकको प्रयास असफल भइरहेको छ । उपमहानगरपालिकाले अहिले पुनः फुटपात खाली गराउन कस्सिएको छ । फुटपातसँगै ठेला, अटोरिक्सा ब्यवस्थापनको कामलाई पनि अगाडी लैजाने उपमहानगरपालिकाको योजना रहेको छ । उपमहानगरका विभिन्न स्थानमा फुटपात लगायत अतिक्रमणमा परेका क्षेत्र खाली गराउनुभन्दा पहिले सार्वजनिक सूचना दिन लागिएको मेयर (नगर प्रमुख) प्रशान्त विष्ट बताउँछन् ।
फुटपात लगायत अतिक्रमित क्षेत्र खाली गराउन मेयर विष्ट आइतबार अपरान्ह आफै सडकमा निस्केका थिए । फुटपात अतिक्रमण नियन्त्रण, ठेला र अटोरिक्सा ब्यवस्थापनका विषयमा उनले ब्यवसायीका प्रतिनिधी, प्रहरी, ट्राफिक प्रहरी, सञ्चारकर्मी लगायत सरोकारवालासँग छलफल तथा परामर्श समेत लिएका थिए ।
लगत्तै सडकमा निस्केका उनले ब्यापारीलाई दुई हात जोड्दै फुटपात खाली गराउन अनुरोध गरे । नगर प्रमुख विष्ट सहित वडा नम्बर ८ का वडाअध्यक्ष रजनीश वाजपेयी, नेपालगन्ज उद्योग वाणिज्य संघका अध्यक्ष अब्दुल वाहिद मन्सुरी, महासचिव चिरञ्जिवी ओली, जिल्ला ट्राफिक प्रहरी प्रमुख हिमालय शाह, वडा प्रहरी प्रमुख रिपेन्द्र कुमार सिंह लगायत निस्केका थिए ।
नेपालगन्ज उद्योग वाणिज्य संघको कार्यालयबाट सुरु भएको फुटपात अतिक्रमण नियन्त्रण अभियान त्रिभुवन चोक, सदरलाईन, त्रिवेणी मोड हुदै करिव दुई सय मिटर पुर्वसम्म पुगेर पुनः फर्केको थियो । सो क्रममा अधिकांस ब्यापारीले फुटपात खाली गर्ने प्रतिवद्धता ब्यक्त गरेका थिए ।
मेयर विष्ट सहितको टोलीले आइतबार स्थलगत अनुगमन गरेर फुटपात खाली गराउन अनुरोध गरेको ठाउँ सोमबार फेरीपनि अस्तब्यस्त देखिएको छ । ब्यापारीले सडक पेटीमै बिक्रीका लागि सामान राखेका छन् । सडक पेटी र फुटपातमा सामान राख्ने ब्यापारीबीच नै प्रतिस्पर्धा भइरहेको छ । यसले गर्दा सवारी आवागमन मै समस्या उत्पन्न भएको छ ।
यो पनि पढ्नुस् :
अतिक्रमित संरचना हटाउन खोज्दा कोहलपुरमा तनाव
फुटपात अतिक्रमण खाली गर्न नगर प्रमुख विष्टले देखाए सक्रियता- (भिडियो सहित)
अतिक्रमित क्षेत्र खाली गराउँदै उपमहानगरपालिका
भिडियो हेर्नुस् :
