कोहलपुर: अतिक्रमण गरिएका संरचना हटाउन खोज्दा कोहलपुरमा तनाव उत्पन्न भएको छ । कोहलपुरको न्यूरोडमा अतिक्रमण गरि बनाइएका संरचना तथा टहरा हटाउन नगर प्रमुख पूर्णप्रसाद आचार्य सहितको नेतृत्वमा टोली बिहानै देखि खटिएको थियो ।
कोहलपुरको न्यूरोडमा रहेको ३/४ वटा अतिक्रमित टहरा भत्काएर बसपार्क पुगेको डोजरमाथि स्थानीयले ढुङ्गा प्रहार गरेपछि विवाद उत्पन्न भएको प्रहरीले जनाएको छ । विकल्प नदिएर अचानक डोजर लगाएको भन्दै स्थानीय बासिन्दा विरोधमा उत्रिएको र स्थिती तनावपुर्ण बनेको इलाका प्रहरी कार्यालय कोहलपुरका प्रमुख एनबहादुर मल्लले बताए । "स्थिती तनावपुर्ण नै छ, अहिले डोजर चलाइएको छैन, सिडिओ साब पनि आउदै हुनुहुन्छ," उनले भने ।
जिल्ला ट्राफिक प्रहरी प्रमुख हिमालय शाहले अतिक्रमित संरचना हटाइरहेको अवस्थामा स्थानीयले विरोध जनाएपछि अहिले स्थगित भएको बताए । "अहिले काम रोकिएको छ, मेयर साब लगायत जनप्रतिनिधीहरु पनि यतै हुनुहुन्छ," उनलेे भने ।
नगर प्रमुख आचार्यले अतिक्रमित संरचना हटाउने क्रममा स्थानीयले अवरोध गरेको बताए । "हामीले संरचना तथा टहरा हटाउदै थियौ, एक्कासी आएर अवरोध पुर्याउन खोजे, अहिले हटाउने काम रोकिएको छ," दूरसंचार डटकमसंग उनले भने ।
कोहलपुरका सचेत नागरिकहरुलाई उनलेे सामाजिक संजालमार्फत पनि अपिल गरेका छन । कोहलपुर बसपार्कमा उपस्थित भएर अभियानमा साथ दिन उनले सबैलाई अनुरोध गरेका छन । "बेथिति र माफिया तन्त्रको अन्त गर्ने अभियान सुरु हुदैछ," आचार्यले भनेका छन ।
