कोहलपुर : कोहलपुर नगरपालिका वडा नम्बर ४ स्थित गोहवा र बेलनपुरमा गाउँ ब्लकका १ सय १ घरधुरीलाई बुधबार मेयर पूर्णप्रसाद आचार्य, उपमेयर संगिता सुवेदी र वडा नम्बर ४ का वडा अध्यक्ष मुबारक अलि गुजरले जग्गाधनी लालपुर्जा वितरण गरे । लालपुर्जा लिन स्थानीय भूमिहिनको ठुलै संख्यामा उपस्थिती थियोे ।
धेरै समयपछि लालपुर्जा पाउँदा भुमिहिनहरु दंग परे । त्यही भिडमा रहेका एक जना भुमिहिनले भने, ‘आज बल्ल नेपाली नागरिक भएको जस्तो अनुभुति भएको छ, खुसीको सिमा नै छैन ।’ आफ्नै हातबाट भुमिहिनलाई लालपुर्जा वितरण गर्न पाउँदा उपस्थित जनप्रतिनिधीको पनि खुसीको सिमा रहेन । चुनावको समयमा जनता समक्ष उनीहरुले गरेका बाचा मध्ये महत्वपूर्ण र संवेदनशिल विषय पनि थियो, लालपुर्जा वितरण ।
लालपुर्जा वितरण गरिसकेपछि नगर प्रमुख पूर्णप्रसाद आचार्यले संविधानमा भएको ब्यवस्था अनुसार नागरिकका हक कार्यान्वयलाई अहिलेको सरकारले पहिलो प्राथमिकतामा राखेको प्रष्ट्याए । कोहलपुरमा जग्गाको लालपुर्जा वितरण कार्य सुरु भइसकेको र केही महिनामा सबै वडामा लालपूर्जा वितरण हुने बताए । मेयर आचार्यले अगाडी भने, ‘अहिले नापी कार्यालयबाट जग्गा नाप्ने काम तिव्र गतिमा भइरहेको छ, अबको केही महिनामा सबै वडामा जग्गा धनी लालपूर्जा वितरणको काम हुन्छ ।’
उपप्रमुख सुवेदीले लालपुर्जा पाएसँगै बैंकिङ कारोबार गर्न निकै सहज हुने बताइन् । ‘विगतमा लामो समयसम्म यहाँहरुले जमिन उपयोग गर्नुभयो तर स्थायी लालपूर्जा पाउनु भएको थिएन, त्यसको पीडा निकै भोग्नु भयो, अब लालपुर्जा हातमा आईसक्यो, अब दुःख पाउनु हुन्न,’ उनले भनिन् ।
नापी कार्यालय बाँकेका प्रमुख सहदेव सुवेदीले गाउँ ब्लकमा उपयोग गरिरहेका जग्गाधनी लालपूर्जा लिनका लागि कार्यालयमा निवदेन आईसकेपछि छानविन गरेर पुर्जा उपलब्ध गराउने बताए । वडाअध्यक्ष गुजरले आफ्नो पहिलो उद्देश्य लालपूर्जा वितरण गर्ने भएको र सोही अनुसार आज लालपूर्जा वितरण गर्न सफल भएको दाबी गरे ।
यो पनि पढ्नुस् :
हातमा लालपुर्जा छ, छैन जग्गाको श्रेस्ता
