नेपालगन्ज : बाँकेको कुसुमबाट हराएका बालिका अझै फेला परेका छैनन् दाङसँग सिमा जोडिएको बाँकेको राप्ती सोनारी गाउँपालिका वडा नम्बर १ कुसुम बैरिया निवासी ११ वर्षका बन्दना बि.क र निशा परियार यही असोज ४ गते राती घरबाटै हराएका थिए ।
उनीहरु हराएको एक हप्ता पुगिसक्दा पनि अझै फेला नपरेका हुन् । ‘अहिलेसम्म आफन्त कहाँ चारैतिर खोजी कार्य भईसक्यो, तर कतै पत्ता लागेको छैन,’ आफन्त बिक्रम नेपालीले टेलिफोनमा भने ।
परिवारका अनुसार मंगलबार बेलुका करिव ८ बजेतिर घरमा खाना खाएर सुत्ने क्रममा उनीहरु एक्कासी हराएका थिए । बालिका हराएको दुई दिनपछि बिहीबार परिवारले ईलाका प्रहरी कार्यालय कुुसुममा निवेदन दर्ता गराएका थिए । ईप्रका कुसुमले परिवारसँग बालिकाको फोटो मागेर हुलिया सहितको विवरण ईलाका प्रहरी कार्यालय कोहलपुरमा पठाएको थियो ।
प्रहरीले हराएका बालिकाको अवस्था अहिले सम्म पत्ता लगाउनै सकेको छैन । बालिकाको खोजी गर्नमा प्रहरीले खासै चासो नदेखाएको स्थानीयले बताएका छन् । यस्तै परिवारले पनि खोज तलास गर्न खेलाची गरेको स्थानयिको आरोप छ । ‘प्रहरीबाट जुन हिसाबले खोजी हुनुपथ्र्यो, त्यो पटक्कै भएको देखिएन, परिवार पनि संवेदनशिल भएको देखिन्न,’ कुसुमका एक स्थानीयले भने ।
दुबै बालिकाको आमा दोस्रो बिबाह गरेर अन्यत्रै गएका छन् । बुवाले दोस्रो बिबाह गरेपछि निशा माउली हजुरबुवासँग र बन्दना कान्छी आमा तथा हजुरआमासँग बस्दै आएकी थिइन् ।
आफन्तका अनुसार निशाले स्थानीय कुसुमेश्वर माध्यामिक बिद्यालयको कक्षा ४ र बन्दनाले सोही बिद्यालयको कक्षा ३ मा पढ्थ्ये । हराएका मध्येका एक बालिका केही समय अगाडी आफ्नी आमासँग पोखरा गएकी थिइन् । पोखराबाट फर्केपछि उनले समय समयमा पोखरातिर फोन गर्थिन् ।
कतै उनैले साथीलाई लिएर पोखरा गएकी त छैनन् ? भन्ने परिवारको आशंका रहेको छ । त्यही आशंकाले गर्दा परिवारका सदस्यहरु खोजी गर्न पोखरातिर गएको प्रहरीले जनाएको छ । तर, रातको समय, त्यसमा पनि नाबालिकाहरु एक्लै पोखरा जाने कुरा असम्भव रहेको कतिपय आफन्तको अड्कल छ ।
ईलाका प्रहरी कार्यालय कोहलपुरका प्रमुख, प्रहरी नायव उपरीक्षक(डिएसपी) ऐनबहादुर मल्लले परिवारका सदस्यहरु बालिकाहरुको खोजी गर्न पोखरातर्फ गएको जानकारी आफुले पाएको बताए । ‘प्रहरीले सोधपुछ गर्ने काम गरिरहेको छ, बालिकाहरुको आफन्त पनि पोखरा गएको आशंकामा खोजी गर्न गएका छन्, उनीहरु दुई÷तीन दिनभित्रमा फर्केपछि वास्तविकता थाहा होला ।’
सम्बन्धित समाचार पढ्नुस् :
बाँकेको कुसुममा घरबाटै हराए दुई बालिका
