नेपालगन्ज : नेपालगन्ज उपमहानगरपालिका वडा नम्बर १० भृकुटीनगरस्थित एक घरभित्र भएको बिष्फोट पश्चात फेला परेका थप दुई वटा प्रेसर कुकर बमलाई डिस्पोज गरिएको छ । जिल्ला प्रहरी कार्यालय बाँकेका अनुसार स्थानीय दिवाकर बिक्रम मल्लको घरभित्र बम बनाउने क्रममा बुधबार बेलुका ८:१० बजेतिर बिष्फोट भएको थियो ।
बिस्फोट लगत्तै सुरक्षाकर्मीको टोली कोठाभित्र पसेर हेर्दा थप दुई वटा प्रेसर कुकर बम भेटिएपछि नेपालगन्जको राँझास्थित बज्रदल गणमा कार्यरत नेपाली सेना आएर बुधबार राती साढे १० बजेतिर एउटा र ११ बजेतिर अर्को बमलाई सुरक्षित रुपले डिस्पोज गरेका हुन् । नेपाली सेनाले करिव २ सय मिटर टाढा खेतमा लगेर दुबै बम डिस्पोज गरेको थियो ।
जिल्ला प्रहरी कार्यालय बाँकेका प्रवक्ता एवम् प्रहरी नायव उपरीक्षक (डिएसपी) रामप्रसाद घर्तीमगरले घटनास्थलमा फेला परेका थप दुई वटा बमलाई सेनाको टोलीले निस्कृय पारेको जानकारी दिए । ‘कोठाभित्र फेला परेका दुई वटै बमलाई सेनाको टोलीले निस्कृय पारिसकेको छ,’ उनले भने ।
बम बनाउने क्रममा बिस्फोट हुँदा उक्त घरमा डेरा गरी बस्ने नेत्र बिक्रम चन्द विप्लप समुहका २ जना कार्यकर्ता घाइते भएका थिए । विप्लव समुह निकट विद्यार्थी संगठनका बाँके जिल्ला अध्यक्ष समेत रहेका सल्यान बागचौर नगरपालिका वडा नम्बर २ निवासी डिल्लीबहादुर डि.सी (क्षेत्री) र सोही संगठनमा आवद्ध कैलाली घोडाघोडी-१ निवासी धर्मराज सुनार घाइते भएका हुन् ।
उनीहरु दुबै जनालाई भेरी अस्पताल नेपालगन्जमा प्रारम्भिक उपचार गरेर थप उपचारका लागि राती नै नेपालगन्ज मेडिकल कलेज शिक्षण अस्पताल नेपालगन्जमा लगिएको डिएसपी घर्तीले जानकारी दिए । घाईते मध्ये सुनारको अवस्था गम्भिर रहेको उनले बताए ।
बम बिस्फोट भए लगत्तै उक्त घरबाट निस्केर अन्य ३ जना मोटरसाईकल चलाएर फरार भएको कुरा प्रत्यक्षदर्शीले बताएपनि प्रहरीले यसको एकिन गर्न सकेको छैन । ‘घटनाको अनुसन्धान सुरु गरेका छौं, घटनाका घाइते भएका एक जना मात्र बोल्न सक्ने भएको हुँदा उनीसँग सामान्य सोधपुछ मात्रै गरेका छौं, विस्तृत अनुसन्धानबाट खुल्नेछ,’ घर्तीले भने ।
घटनास्थल रहेको घरको कोठाभित्र प्रेसर कुकरका टुक्रा, विष्फोटक पद्धार्थ, परिचय पत्र, कागजात, रसिद, पर्चा, पम्प्लेट लगायत पनि फेला परेको प्रहरीले जनाएको छ । उक्त घरमा विप्लपका कार्यकर्ता करिव एक वर्षदेखी डेरा गरेर बस्दै आएपनि मल्ल परिवारले उनीहरु पढ्ने बिद्यार्थी भएको कुरा मात्र थाहा पाएको प्रतिक्रिया दिएका छन् ।
उक्त घटनापछि नेपालगन्जबासी त्रसित भएका छन् । आगामी मंसिर ४ गते हुन लागेको प्रतिनिधी सभा र प्रदेश सभा निर्वाचनलाई लक्षित गरी बम बिस्फोट गराउने योजना विप्लप समुहको रहेको उक्त घटनाले पुष्टी गरेको सुरक्षाकर्मीको आशंका छ ।
यो पनि पढ्नुस् :
बम बनाउने क्रममा नेपालगन्जमा बिस्फोट, विप्लपका दुई कार्यकर्ता घाइते
