राप्तीपारी फेरी पाटेबाघ देखियो, घाँस काट्न जंगल पुगेका स्थानीय बाँच्न सफल

समाज

Home
समाज
राप्तीपारी फेरी पाटेबाघ देखियो, घाँस काट्न जंगल पुगेका स्थानीय बाँच्न सफल

राप्तीपारी फेरी पाटेबाघ देखियो, घाँस काट्न जंगल पुगेका स्थानीय बाँच्न सफल सावधानी अपनाउन स्थानीय बासिन्दालाई अपिल

दूरसञ्‍चार बुधबार, पुस १३, २०७९

बाँके राष्ट्रिय निकुञ्जमा गतवर्ष फेला परेको पाटेबाघ । फाईल तस्बिर : दूरसञ्चार

बाँके (राप्ती सोनारी) : बाँकेको राप्ती सोनारी गाउँपालिका वडा नम्बर ५ स्थित एक सामुदायिक वनभित्र स्थानीय बासिन्दाहरु पाटेबाघको आक्रमणबाट जोगिन सफल भएका छन् । राप्ती सोनारी ५ स्थित सिद्देश्वरी सामुदायिक वन क्षेत्रमा घाँस काट्न गएका बेला बुधबार दिउँसो स्थानीय बासिन्दाले बाघलाई फेला पारेका हुन् ।

पाटेबाघलाई देखेपछि करिव १२/१५ जनाको संख्यामा पुगेका स्थानीय बासिन्दाले हो-हल्ला गरेका थिए । त्यसपछि बाघ त्यहाँबाट भागेको र स्थानीय बासिन्दाहरु बाँच्न सफल भएको ईलाका प्रहरी कार्यालय धामपुरका ईन्चार्ज एवम् प्रहरी नायव निरीक्षक प्रविण डिसीले जानकारी दिए ।

‘धेरै संख्यामा महिला र पुरुष जंगलमा भएका कारण हो-हल्ला गरेपछि बाघ भागेको रहेछ, नत्र बाघले आक्रमण गर्न सक्थ्यो,’ उनले भने । राप्तीपारीको जंगलमा बाघ रहेकाले सावधानी अपनाउनुपर्ने अवस्था आएको प्रहरी ईन्चार्ज डिसीले बताए ।

गतवर्ष पनि राप्ती सोनारीको वडा नम्बर ४, ५, ६ र ७ को जंगलमा पाटेबाघले आतंक मच्चाएको थियो । त्यसपछि डिभिजन वन कार्यालय, बाँके राष्ट्रिय निकुञ्ज लगायतको टोलीले बाघलाई नियन्त्रणमा लिएर चितवन पुर्याएको थियो ।

पाटेबाघले यसवर्ष पनि राप्ती पारी क्षेत्रमा आतंक मच्चाउन सुरु गरेको स्थानीय बासिन्दाले बताएका छन् । केही दिनअघि मात्र बाघले दुई वटा बाख्रा र एउटा सुँगुर मारेको थियो ।

प्रकाशित मिति: बुधबार, पुस १३, २०७९ १५:२०

प्रतिक्रिया दिनुहोस्