नेपालगन्ज : नेपालगन्ज उपमहानगरपालिका वडा नम्बर २ का एक होटल तथा क्यासिनो ब्यवसायीले सरकारी, सार्वजनिक जमिन हडपेका छन् । अहिले उनले ब्यक्तिगत जमिनमा समेत आँखा लगाएर दुःख दिइरहेको आरोप लागेको छ ।
उक्त वडाको सुर्खेत रोडमा अवस्थित ‘होटल डायमण्ड प्यालेस’ प्रालि (साविक सिग्नेट ईन कृष्णा होटल) का सञ्चालक सुरेन्द्र बहादुर सिंहले सरकारी, सार्वजनिक जमिन हडपेर संरचना बनाएको र साँधमा रहेका ब्यक्तिगत जमिन समेत हडप्न खोजेको आरोप लागेको हो ।
भिडियो हेर्नुस् :
सरकारी र सार्वजनिक जमिन मिचेर निर्मित होटलले आफ्नो ब्यक्तिगत जमिनमा समेत आँखा लगाएर हडप्न खोजिरहेको छिमेकी सुरेन्द्रकुमार श्रेष्ठले सोमबार पत्रकार सम्मेलनमार्फत सार्वजनिक गरे । साविक सिग्नेट ईन कृष्णा होटल रहेको उक्त जग्गालाई होटल तथा क्यासिनो सञ्चालक सिंहले ब्यवसायी दिपेन्द्र अग्रवालसँग केही समयअघि खरिद गरेका थिए ।
होटल सञ्चालकले आफ्नो जमिन हड्प्न खोजेपछि श्रेष्ठले ‘निषेधाज्ञा’ माग गर्दै उच्च अदालत तुलसीपुर नेपालगन्ज इजलासमा रिट दायर गरेका थिए । अदालतले विपक्षी सिंह विरुद्ध यही माघ २० गते अन्तरिम आदेश जारी गरिसकेको छ । तर, होटल तथा क्यासिनो ब्यवसायी सिंहले अदालतको अन्तरिम आदेशलाई अटेरी गर्दै सोही दिन आफ्नो पर्खाल लगायत भौतिक संरचनामाथी डोजर चलाएको श्रेष्ठले आरोप लगाएका छन् ।
होटल तथा क्यासिनोका महेन्द्र चन्द र पुस्कर हमालले आफुमाथी डर, त्रास देखाइरहेको दुखेसो पोखे । यस विषयमा प्रतिक्रिया लिन होटल तथा क्यासिनो सञ्चालक सिंहलाई पटक पटक फोन गर्दा सम्पर्क हुन सकेन । सिंहले होटल र क्यासिनोका ‘गुण्डा’ प्रयोग गरेर जवरजस्ती डोजर चलाउँदा करिव १७ लाख रुपैयाँ बराबरको भौतिक संरचनामा क्षति पुगेको उनले सुनाए । होटलले बिना नम्बर प्लेटको डोजर प्रयोग गरी दादागिरी शैलीमा संरचना भत्काएको उनको आरोप छ ।
श्रेष्ठले २०५९ सालमा १७१ नम्बर कित्ता रहेको २ कठ्ठा साढे १४ धुर जमिन किनेर २०६४ सालमा घर निर्माण गरेको बताएका छन् । ‘मैले त्यतिबेला नगरपालिकाबाट नक्सापास गरेर घर बनाएको थिए, म विगत ४÷५ वर्षदेखी श्रीमतीको उपचारका लागि काठमाडौंतिर ब्यस्त भएको मौका छोपेर नयाँ नापी गराएर मेरो जग्गा हडप्न खोजेको नियत देखिन्छ,’ श्रेष्ठले भने ।
साविकका जग्गाधनी अग्रवालले १४ कठ्ठा जमिनमा सरकारी, सार्वजनिक र ब्यक्तिगत जमिन हडपेर अहिले १८ कठ्ठा पुर्याएको उनको जिकिर छ । उक्त होटलले अर्का स्थानीय योगेन्द्र स्वाँरको करिव ८ धुर र कालिमाई मन्दिरको करिव ४ कठ्ठा जमिन हडपेको र आफ्नो पनि करिव ५ धुर जमिन अहिले हडप्ने प्रयास गरिरहेको श्रेष्ठले सुनाए ।
अदालतको अन्तरिम आदेश विरुद्ध होटल सञ्चालकले आफ्नो संरचनामा जवरजस्ती डोजर चलाएपछि अदालतमा पुनः अवहेलना मुद्दामा दायर गरिएको श्रेष्ठले बताए । ‘मलाई अहिले पनि उनीहरु डर, धम्की दिइरहेका छन्, मेरो ज्यान जोखिममा छ,’ उनले भने ‘ज्यान सुरक्षा गरि पाउँ भनेर मैले माघ १९ गते जिल्ला प्रशासन कार्यालय बाँकेमा निवेदन दिइसकेको छु ।’
सरकारी, सार्वजनिक र ब्यक्तीगत सम्पत्तीमाथी आँखा लगाउनेमाथी छानविन गरिदिन उनले सम्वद्ध निकायसँग आग्रह गरेका छन् । आफुसँग सबै प्रमाणहरु रहेको श्रेष्ठको दाबी छ ।
