नेपालगन्ज : ‘नेपालगन्ज किड्स रेस’ र ‘टुर दि ठाकुरद्धारा’ को पाँचौ संस्करण यही माघ २६, २७ र २८ गते सुरु गरिदैछ । आयोजक नेपालगन्ज साईकिलिङ्ग क्लबले बुधबार पत्रकार सम्मेलन गरेर यसबारे जानकारी दिएको हो ।
क्लबका अध्यक्ष सतिश निरौलाले सबै तयारी पुरा भएको जानकारी दिए । नेपालगन्ज किड्स रेस नेपालगन्ज उपमहानगरपालिका वडा नम्बर १ वाटरपार्कमा बिहीबार(भोली) बिहान ८ बजे गर्ने तयारी छ । जसमा करिव ३० जना बालबालिकाले प्रतिस्पर्धा गर्नेछन् ।
उक्त कार्यक्रममा प्रथम, द्धितिय र तृर्तिय हुने बालबालिकाले मेडल, प्रमाणपत्रर नगद तथा जिन्सी पुरस्कार प्राप्त गर्नेछन् भने सहभागीले प्रमाणपत्र प्राप्त गर्नेछन् । टुर दि ठाकुरद्धारामा सहभागी हुन नेपालका सातै प्रदेशबाट १ सय ४० र भारतका विभिन्न सहरहरुबाट २९ र स्थानीय १ सय ५ साईकल यात्री २ सय ७४ सहित अतिथी सुरक्षाकर्मी, सञ्चारकर्मी गरी ३ सय जनाको सहभागिता रहने आयोजकले जनाएको छ ।
‘माघ २६ गते बाहिरबाट आएका पाहुनालाई नेपालगन्जमा रहेको प्रशिद्ध धार्मिक शक्तिपीठ बागेश्वरी मन्दिरको दर्शन गराई यस क्षेत्रमा रहेका अन्य पर्यटकीय स्थलको अवलोकनका साथै नगर परिक्रमा गराईनेछ,’ अध्यक्ष निरौलाले भने ‘यो कार्यक्रममा ४२ महिला साईकल यात्रीहरुको सहभागिता रहनेछ ।’
माघ २७ गते बिहान ७ बजे नेपालगन्जमा रहेको बागेश्वरी मन्दिरबाट औपचारिक कार्यक्रम पश्चात यात्रा प्रारम्भ गरिनेछ । बागेश्वरी मन्दिरबाट सुरु भई उक्त यात्रा त्रिभुवन चोक, विपी चोक, धम्बोझी चोक हँुदै खजुरा, बढैयाताल, बाँसगढी, सतखलुवा, बवई, भुरिगाउँ हुँदै ठाकुरद्धारा सम्मको करिव १ सय किलोमिटर यात्रा गरिने बताइएको छ ।
कार्यक्रममा विशेष सहभागिता जनाउन विश्व साईकल यात्री तथा सगरमाथा आरोही पुस्कर शाह तथा चर्चित वाईल्ड लाईफ फोटो ग्राफर चुङ्गवा शेर्पा समेत नेपालगन्ज आउने क्लबले जनाएको छ । तीन सय साईकल यात्री विच वातावरण संरक्षण प्रकृति संरक्षण वन्यजन्तु संरक्षण सम्वन्धी छलफल गरिनेछ । साथै टुर दि ठाकुरद्धारा ५ औं संस्करणका अवसरमा ठाकुरवावा मन्दिर परिसरमा विभिन्न ५ प्रकारका विशेष विरुवा रोपिने अध्यक्ष निरौलाले जानकारी दिए ।
