नेपालगन्ज : विगतका वर्षझै यसवर्ष पनि नेपालगन्जमा नागरिक स्तरबाट राष्ट्रिय झण्डा दिवस मनाइएको छ । दिवसको अवसरमा नेपालगन्जस्थित रामलिला मैदानमा शुक्रबार बेलुका आठौं राष्ट्रिय झण्डा महोत्सव गरिएको हो ।
हरेक वर्ष नयाँ वर्षको दिन नेपालगन्जमा झण्डा दिवस मनाउने गरिन्छ । अन्तरालको आयोजना तथा बास नेपाल र गैर सरकारी संस्था महासंघ नेपाल बाँकेको संयोजनमा महोत्सव गरिएको हो । राष्ट्रिय झण्डा दिवसका परिकल्पनाकार एवम् अन्तरालका प्रमुख कार्यकारी जयनारायण शाहले दिवसको सुरुवातदेखी हालसम्म जसरी पनि निरन्तरता दिदै आएको बताए ।
‘हामीले गतवर्ष रंगशालामा मनायौं, बीचमा कोभिडको कारणले गर्दा निरन्तरता दिने विभिन्न उपाय गर्यौ, हामीले जसरी पनि निरन्तरता दिने प्रयास गरेका हौं,’ उनले भने । यो कुनै सरकारले तोेकेको दिवस नभएको शाहले बताए ।
उनले अगाडी भने, ‘यो नागरिक स्तरबाट मनाइएको दिवस हो, राष्ट्रिय तथा अन्र्तराष्टिय दिवसहरु मनाइन्छ, नामै नसुनेका दिवस पनि मनाइन्छ, स्वदेशी दिवसमा बिदा दिने र काट्ने चलन पनि छ, विश्वका विभिन्न देशले मनाउने दिवस मनाउँछौं, स्वदेशी र विदेशी दिवस मनाइरहँदा हामी आफ्नो ध्वजाको दिवस मनाउने कुनै आधिकारिक ब्यवस्था छैन ।’
राष्ट्रिय झण्डालाई बीचमा च्यात्ने र जलाउने काम भएका बेलामा आफुहरुले झण्डाको महत्व र गरिमालाई बढाउनुपर्छ भनेर नागरिक स्तरबाट दिवस मनाउन सुरु गरेको प्रष्ट्याए । ‘यसलाई जनस्तरमा लैजानुपर्छ र दिवसलाई महोत्सवको रुपमा मनाउनुपर्छ भनेर हाम्रो नेपाली नयाँ वर्षको दिनलाई पारेर दिवस मनाउन सुरु गरेका हौं,’ उनले भने । शाहले रामलिला मैदानमा ठुलो राष्ट्रिय झण्डा राख्न नेपालगन्ज उपमहानगरपालिकालाई आग्रह गरे ।
उक्त कार्यक्रममा लुम्बिनी प्रदेश सभाका सांसद माया पुन, नेपालगन्ज उपमहानगरपालिकाका मेयर प्रशान्त विष्ट, गैर सरकारी संस्था महासंघ बाँकेका अध्यक्ष चन्द्र तिमिल्सिेना, गैसस बाँकेका निर्वतमान अध्यक्ष नमस्कार शाह, कपास विकास समितिका अध्यक्ष हेमन्तराज काफ्ले, विभिन्न सामाजिक क्षेत्रका अगुवा, नागरिक समाज, कलाकार, सञ्चारकर्मी लगायतको उपस्थिती रहेको थियो ।
सो क्रममा वरिष्ठ गायक कमल बिके निर्मोही, वरिष्ठ कलाकार श्यामानन्द सिंह लगायत कलाकारले आफ्नो प्रस्तुती देखाएका थिए । कार्यक्रम सञ्चालन गैसस बाँकेका सदस्य रमेश सिटौलाले गरेका थिए ।
