बाँके (अगैया) : राप्ती सोनारी गाउँपालिका वडा नम्बर १ स्थित कुसुमेश्वर माध्यामिक बिद्यालयको ब्यवस्थापन समिति सदस्य मनोनयनमा उत्पन्न विवाद मिलाउन राप्ती सोनारी गाउँपालिकाले निर्देशन दिएको छ ।
बिद्यालय ब्यवस्थापन समिति सदस्य मनोनयनप्रति ‘जग्गादाता’ परिवारले आपत्ति जनाएपछि विवाद उत्पन्न भएको थियो । उक्त बिद्यालयको विवाद गाउँपालिकासम्म पुगेपछि यस्तो निर्देशन दिइएको हो । विगतमा हरेक ब्यवस्थापन समितिमा दाताको तर्फबाट एक जनालाई मनोनित गरिन्थ्यो ।
तर, यसपटक आफ्नो परिवारलाई ‘उपेक्षा’ गरिएको भन्दै जग्गादाता स्वर्गिय पिताम्बर खत्रीका छोरा देवीराम खत्री र नाति विजयकुमार खत्रीले गाउँपालिका समक्ष निवेदन पेश गरेका थिए । गाउँपालिकाका प्रमुख प्रशासकीय अधिकृत ओम प्रकाश देवकोटाले कुसुमेश्वर माध्यामिक बिद्यालय राप्ती सोनारी १ को बिद्यालय ब्यवस्थापन समितिलाई आवश्यक छलफल गरी समस्या समाधान गर्न निर्देशन दिएका हुन् ।
बिद्यालयमा शिक्षा ऐन २०२८ को दफा १२ बमोजिम बिद्यालय ब्यवस्थापन समितिको गठन गर्दा रहने सदस्यहरु (दफा १२ को ‘ग’ बमोजिम) मनोनित गर्ने अधिकार बिद्यालय ब्यवस्थापन समितिलाई रहेको र सो कार्य गर्दा चन्दादातालाई बेवास्ता गरी अन्य ब्यक्तिहरु मनोनित गरिएको भनी कार्यालयमा निवेदन आएकोले ब्यवस्थापन समितिले आवश्यक छलफल गरी समस्या समाधान गर्न भनिएको छ ।
गत चैत २३ गते बसेको बिद्यालय ब्यवस्थापन समिति बैठकबाट प्रचलित शिक्षा ऐन तथा नियमावलीको दफा १२ को उपदफा (१) (ग) अनुसार ‘शिक्षाप्रेमी’ र ‘स्थानीय बुद्धिजिवी’ का तर्फबाट दुई जनालाई मनोनित गरिएको बिद्यालयले उल्लेख गरेको थियो । शिक्षा ऐन र नियमावलीमा भएको ब्यवस्था विपरित जग्गादातालाई अपमान हुने गरी परिवारका सदस्यलाई ब्यवस्थापन समितिमा मनोनित नगरिएको भन्दै आपत्ती जनाएका थिए ।
देवीरामका बुवा र विजयका हजुरबुवा स्वर्गिय पिताम्बर खत्रीले उक्त बिद्यालयका लागि बाँकेको राप्ती सोनारी गाउँपालिका वडा नम्बर १ मा आफ्नो १४ विघा २ कठ्ठा १४ धुर जमिन दान गरेका थिए । बिद्यालयले २०२० सालदेखी उक्त जग्गा उपभोग गर्न सुरु गरेपनि २०३३ सालमा कानुनी रुपले बिद्यालयको नाममा हस्तान्तरण भएको थियो । उक्त जग्गा नै बिद्यालयको एक मात्र आम्दानीको स्रोतको रुपमा रहेको छ ।
बिद्यालयले उक्त जग्गालाई वर्षेनी ठेक्का दिएर पनि लाखौं रुपैयाँ आम्दानी गरिरहेको छ । जग्गाको आम्दानीबाट बिद्यालयले निजी स्रोतका शिक्षकको तलब, बिद्यालयको प्रशासनिक खर्च लगायतमा ब्यवस्थापन गरिरहेको छ ।
स्वर्गिय दाता खत्रीले जग्गादान गरेपछि उक्त बिद्यालयको हरेक ब्यवस्थापन समितिमा दाताको तर्फबाट परिवारका सदस्यलाई मनोनित गरिदै आएको थियो । बिद्यालय परिसरमै जग्गादाता स्वर्गिय खत्रीको शालिक समेत राखिएको छ ।
यो पनि पढ्नुस् :
कुसुमेश्वरको ब्यवस्थापन समिति मनोनयनमा विवाद, जग्गादाता परिवारलाई 'उपेक्षा'
