नेपालगन्ज : राप्ती सोनारी ७ फत्तेपुर र नरैनापुर ६ मा भत्केको राप्तीको तटबन्ध मर्मत गर्न चासो नदिएपछि स्थानीय बासिन्दा त्रसित भइरहेका छन् । उक्त तटबन्ध तत्काल मर्मत नगर्ने हो भने ठुलो क्षति ब्यहोर्नुपर्ने निश्चित रहेको यहाँका स्थानीय जनप्रतिनिधि बताउँछन् ।
राप्ती नदीको विभिन्न ठाउँमा निर्माण गरिएको तटबन्धमा २०७९ असोज महिनामा आएको बाढीले क्षति पुर्याएको थियो । राप्ती सोनारी ७ का वडाअध्यक्ष रामलखन थारु भत्केको तटबन्ध तत्काल मर्मत नगर्ने हो भने आउँदो बर्खामा ठुलो जनधनको क्षति ब्यहोर्नुपर्ने निश्चित रहेको बताउँछन् ।
उनका अनुसार राप्ती सोनारी ७ मा मात्रै करिव ११ सय मिटर लामो तटबन्ध मर्मत गर्नु पर्ने देखिएको छ । ‘तटबन्ध भत्केपछि पार्टीका नेता, सांसद र जनताको तटन्ध कार्यालयका कर्मचारी आएर निरीक्षण गर्नुभयो, तत्काल मर्मत गर्ने भनेर वडा कार्यालयलाई बोरा र जाली ल्याउन लगाउनु भयो, त्यतिबेला प्राविधिकले पानीको बहाव धेरै छ भनेपछि काम रोकियो,’ उनले भने ‘त्यसपछि पनि हामीले जनताको तटबन्ध कार्यालयमा धेरै पटक धायौं, तर बजेट छैन भनेर फर्काउनु भयो ।’
तटबन्धका लागि वडा कार्यालय र राप्ती सोनारी गाउँपालिका कार्यालयले गर्नुपर्ने सबै कानुनी प्रक्रिया पुरा गरेको वडाअध्यक्ष थारु बताउँछन् । ‘यो काम सिँचाई मन्त्रालयमार्फत जनताको तटबन्ध कार्यालयले गर्ने हो, दाङको लमहीमा यसको कार्यालय छ, कार्यालयका हाकिमले कुरा बढी गर्ने, काम नगर्ने समस्याले गर्दा पनि यो अवस्था आएको हो,’ उनले थपे ।
बर्खा अगाडी तटबन्ध मर्मत नभएमा ठुलो जनधनको क्षति हुनुका साथै नेपाल सरकारले लगानी गरेको अर्बौको लगानी पनि डुब्ने वडाअध्यक्ष थारुको चिन्ता छ । नरैनापुर गाउँपालिका ६ का वडाअध्यक्ष प्रेमचन्द्र मौर्य बर्खायाम आउँनै लाग्दा स्थानीय बासिन्दामा त्रास सिर्जना भइरहेको बताउँछन् ।
‘हाम्रो वडाको सोनवर्षा गाउँमा डुब्ने डर छ, कुनबेला बाढी आउने हो भनेर जनता त्रसित छन्,’ उनले भने । तटबन्ध मर्मत गर्नका लागि प्रदेश र संघिय सांसदले निरीक्षण गरेर गएपनि अहिलेसम्म मर्मतको काम सुरु नभएको वडाअध्यक्ष मौर्यले सुनाए । उनका अनुसार नरैनापुर ६ मा करिव डेढ सय मिटर क्षेत्र मात्रै तटबन्ध मर्मत गर्नुपर्ने देखिएको छ ।
सम्बन्धित समाचार पढ्नुस् :
बर्खा नजिक आउँदा फत्तेपुर गाउँमा बाढीको डर
