नेपालगन्ज : मानव सेवा आश्रम सञ्चालन गर्न नेपालगन्जमा मुठ्ठीदान संकलन सुरु गरिएको छ । आश्रमले सडक मानवको मानवोचित व्यवस्थापनका निम्ति २०७९ बैशाख १ गतेबाट नेपालगन्ज उपमहानगरपालिकाको वडा नम्बर १० स्थित आदर्शनगर, सुर्खेतरोडमा घर भाँडामा लिई सेवा सञ्चालन गर्दै आएको छ ।
अहिले ५० भन्दा धेरै बेसहाराहरु आश्रममा आश्रित छन् । जसमा ५ जना महिला, ३ जना बालबालिका र ४५ जना पुरुष रहेका छन् । यहाँ एक वर्षकी बालिका देखि ८० वर्ष भन्दामाथि उमेरका बृद्धबृद्धाहरु पनि बसिरहेका छन् ।
ति मध्ये ४० जना मनोसामाजिक समस्याबाट ग्रसित छन्, भने उनीहरुले नियमित औषधि सेवन पनि गर्दै आईरहेका छन् । आम्दानीको श्रोत भनेको नै मुठ्ठीदान भएकाले आश्रमले स्थापनाको समयदेख नै दातृ निकायको सर्त सहितको सहयोग स्वीकार नगर्ने आदर्शलाई आत्मसाथ गर्दै सेवा सञ्चालन गर्दै आइरहेको छ ।
सेवा सञ्चालन गर्न नेपालगन्जका घर, पसलमा मुठ्ठीदान संकलन गर्न सुरु गरेको मानवसेवा आश्रम नेपालगन्ज शाखाका संयोजक उर्विन सापकोटाले बताए । मुठ्ठीदान संकलन गर्ने क्रममा सेवा सञ्चालनको लागि ११ हजार ४ सय १५ रुपैयाँका साथै चामल,बिस्कुट, केही थान महिलाले लगाउने कपडा र चप्पल लगायतका सामग्री स्वतस्फुर्त आश्रमले प्राप्त गरेको उनले जानकारी दिए ।
मुठ्ठीदान संकलन गर्नका लागि मानवसेवा आश्रमका युवा स्वयंसेवीहरु चिरन्जीवी बुढा, दिपिका देवकोटा, सुवास सिजापति, प्रकृति थापा, अस्मिता देउवा, साहिं खान र छत्र सुनारको टोलीले सघाएको थियो ।
आश्रमको सेवामा रहने अभियन्ता, साधक साधिका भने स्वयंसेकको रुपमा २४ घण्टा नै समर्पित रहेको सापकोटाले बताए । केही प्राविधिक कर्मचारीहरु, स्वास्थ्यकर्मी, सुरक्षा गार्डहरु भने आवश्यकताको आधारमा केही पारिश्रमिक लिएर २४ घण्टा नै आश्रमको सेवामा रहेको बताइएको छ ।
