नेपालगन्ज : बर्दियाको पर्यटकीय नगरी ठाकुरद्धारामा रहेको ठाकुरबाबा मन्दिर परिसरमा साप्ताहिक रुपमा ‘महाआरती’ सुरु गरिएको छ । धार्मिक एवम् ऐतिहासिक महत्व बोकेको ठाकुरबाबा मन्दिरमा हरेक शुक्रबार सन्ध्याकालिन महाआरती सुरु भएको हो ।
ट्राभल एजेन्ट्स एशोसिएशन अफ नेपाल (नाट्टा) बाँकेको अगुवाईमा ठाकुरबाबा मन्दिर व्यवस्थापन, ठाकुरबाबा नगरपालिका प्रर्वद्धक रहने गरी महाआरती शुक्रबार बाट सुरु भएको हो । धार्मिक पर्यटन प्रर्वद्धनमा टेवा पुग्ने उद्देश्यले नगरपालिकाले मन्दिरमा महाआरती सुरुवात गरिएको ठाकुरबाबा नगरपालिका नगर प्रमुख तिलकराम लम्सालले बताए । ‘धार्मिक उद्देश्यले मात्र नभई पर्यटकीय हिसाबले पनि यो आरती महत्वपूर्ण छ,’ उनले भने ।
पश्चिम क्षेत्रकै महत्वपूर्ण गन्तव्यको रुपमा रहेको बर्दिया राष्ट्रिय निकुञ्ज नजिक रहेको ठाकुरबाबा मन्दिरमा महाआरती हुँदा पर्यटकीय गतिविधी बढ्ने भन्दै त्यसक्षेत्रका स्थानीय बासिन्दा हर्षित छन् । नाट्टा बाँके च्याप्टरको अगुवाईमा प्रशिद्ध शक्तिपीठ बागेश्वरी मन्दिरमा पनि यसअघि महाआरती सुरु गरिएको थियो । अहिले हरेक सोमबार महाआरती सञ्चालन भइरहेको छ ।
नाट्टा बाँकेका अध्यक्ष श्रीराम सिग्देलले बागेश्वरी मन्दिरमा प्रत्येक सोमबार हुने महाआरतीले धार्मिक पर्यटन प्रवद्र्धनमा टेवा पुर्याएको स्मरण गर्दै ठाकुरबाबा मन्दिरमा पनि महाआरती सुरुवात गरिएको बताए । बागेश्वरी मन्दिरमा महाआरतीले निरन्तरता पाएपछि ठाकुरबाबा मन्दिरमा पनि महाआरती सुरुवात गरिएको उनको भनाई छ ।
सो क्रममा प्रतिनिधि सभाका सांसद किशोरसिंह राठौंर, बागेश्वरी मन्दिरका मुल महन्त चन्दननाथ योगी, नाट्टा बाँकेका अध्यक्ष सिग्देल, नाट्टाका पदाधिकारी, स्थानीय जनप्रतिनिधि, सर्बसाधारण लगायतको उपस्थिती रहेको थियो । ठाकुरबाबा मन्दिरमा हरेक वर्ष माघे संक्रान्तिका अवसरमा ठूलो मेला लाग्ने गर्दछ ।
