नेपालगन्ज : बाँकेको नरैनापुरमा प्रहरीले सुविधायुक्त भवन निर्माण गरेको छ । नरैनापुर गाउँपालिका वडा नम्बर ५ स्थित भगवानपुरमा इलाका प्रहरी कार्यालयको भवन निर्माण गरिएको हो ।
नवनिर्मित उक्त भवनको सोमबार लुम्बिनी प्रदेशका प्रहरी प्रमुख प्रहरी नायव महानिरीक्षक(डिआईजी) उमेशराज जोशी र नरैनापुर गाउँपालिका अध्यक्ष इस्तियाक अहमद शाहले उद्घाटन गरे । नवनिर्मित कार्यालय भवनसहित कार्यालय प्रमुख निवास, प्रहरी ब्यारेक, भान्सा घर तथा नागरिक सहायता कक्ष पनि निर्माण गरिएको छ ।
उक्त कार्यक्रमलाई सम्बोधन गर्दै डिआईजी जोशीले प्रहरी संगठनलाई आवास तथा भौतिक पूर्वाधारमा आत्मनिर्भर बनाई प्रहरी कर्मचारीको क्षमता अभिबृद्धि गर्ने योजना रहेको बताए । बैज्ञानिक र प्राविधिक उपकरण प्राप्ति र प्रयोगद्वारा संगठनलाई संस्थागत रूपमा मजबुत र सक्षम बनाउन प्रदेश प्रहरी कार्यालय सदैव कटिबद्ध रहेको जोशीले सुनाए ।
आधुनिक भवनसँगै प्रहरीको सेवा प्रतिको इमान्दारिता, जिम्मेवारीबोध, प्रहरी आचरण र व्यवहारले प्रहरी प्रतिको जनविश्वास अभिबृद्धि गर्ने विश्वास लिएको उनको भनाई छ । सोही कार्यक्रममा डिआईजी जोशीले भवन निर्माण कार्यमा संलग्न निर्माण व्यवसायीलाई कदरपत्र तथा भवन निर्माणमा योगदान पुरयाउने प्रहरी कर्मचारीलाई पुरस्कार समेत प्रदान गरेका थिए ।
यस्तै गाउँपालिका अध्यक्ष शाहले नेपाल-भारत सीमावर्ती क्षेत्रमा हुने चोरी तस्करी रोकथाम नियन्त्रण गर्नु, शान्ति सुरक्षा अमन चयन कायम गर्नु, अपराध नियन्त्रण र अनुसन्धान गर्नु, समाजमा शान्ति व्यवस्था कायम गर्नु इलाका प्रहरी कार्यालय भगवानपुरको मुख्यः दायित्व र जिम्मेवारी रहेको बताए । इप्रका नरैनापुर अन्य प्रहरी कार्यालय भन्दा निकै महत्वपूर्ण र विशिष्ट भएको बताए ।
अहिलेको मुख्यः समस्या लागूऔषध भएको स्पष्ट पार्दै उनले अबैध रुपमा भित्रिने अन्य बस्तुले देशको अर्थतन्त्र र राजश्वमा असर पुर्याउने तर, लागूऔषले समाज देश नै धस्त पार्ने अध्यक्ष शाहको भनाई थियो ।
‘कसैले दाल चिनी र चामल अबैध रुपमा अयात गर्दा यसबाट राज्यले खासै ठूलो नोक्सानी व्यहोर्नु पर्दैन,’ अध्यक्ष शाहले भने ‘तर थोरै मात्रामा भित्रिएको लागु औषधले हाम्रो समाज, परिवार र देशनै खत्तम पारिदिन्छ ।’ सो क्रममा जिल्ला प्रहरी कार्यालय बाँकेका प्रमुख एवम् प्रहरी उपरीक्षक सन्तोषसिंह राठौरले स्वागत मन्तव्य व्यक्त गरेका थिए ।
कार्यक्रममा प्रहरी नायव उपरीक्षक एवम् इन्जिनियर ध्रुब अधिकारीले भवन निर्माण सम्बन्धी प्रतिवेदन प्रस्तुत गरेका थिए । प्रदेश सरकारको नियमित बजेटबाट कुल ३ करोड ९ लाख लागतमा नवनिर्मित कार्यालय भवन, कार्यालय प्रमुख निवास, प्रहरी ब्यारेक, भान्सा घर तथा नागरिक सहायता कक्ष भवनको निर्माण कार्य सम्पन्न भएको हो ।
कार्यक्रममा प्रहरी वरिष्ठ उपरीक्षक डिल्लीराज विष्ट, प्रहरी वरिष्ठ उपरीक्षक डा. अमिनकुमार श्रेष्ठ, प्रहरी उपरीक्षक तुलबहादुर कार्की, सशस्त्र प्रहरी नायव उपरीक्षक दिपक चन्द, नरैनापुर गाउँपालिकाका प्रमुख प्रशासकीय अधिकृत मणिराम खराल, नरैनापुर १ का वडाअध्यक्ष इसाक जोलाह, वडा नम्बर २ का वडाअध्यक्ष मसूद अहमद शाह, वडा नम्बर ४ का वडाअध्यक्ष मनोज शर्मा, वडा नम्बर ५ का वडाअध्यक्ष कृष्णचन्द्र मौर्य, वडा नम्बर ६ का वडाअध्यक्ष प्रेमचन्द्र मौर्य, राप्ती सोनारी-६ का वडाअध्यक्ष लवराज खरेल, राप्ती सोनारी-७ का वडाअध्यक्ष रामलखन थारु, नेपाली काँग्रेसका नेता रामचन्द्र मौर्य, नरैनापुरका जिन्सी शाखा प्रमुख भरत महतो, वडा प्रहरी कार्यालय नेपालगन्जका प्रहरी निरीक्षक इन्द्रजित सुनार, ट्राफिक प्रहरी निरीक्षक तिलक सुनार, सशस्त्र प्रहरी निरीक्षक भानबहादुर कार्की लगायत अतिथीको पनि उपस्थिती रहेको थियो ।
