नेपालगन्ज : ऋणको किस्ता तिर्न जब बैंकबाट पत्र आयो, बर्दिया, बढैयाताल-४ निवासी प्यारी मगर्नी छांगाबाट खसेझै भईन् । उनले आफ्नो नामको जमिन धितो राखेर कसैले बैंकबाट यति सजिलै पैसा झिक्ला भन्ने कल्पना सम्म गरेकी थिइनन् । तर, नसोचेकै घटना आईलाग्यो ।
कागजात किर्ते गरी ‘दलाल’ ले आफ्नो लालपुर्जाबाट ऋण निकालेको थाहा पाएपछि अहिले उनी न्यायका लागि विभिन्न निकायमा धाईरहेकी छन् । ‘बैंकले अहिले दिनहुँ किस्ता बुझाउन ताकेता गरिरहेको छ, मैले ऋण खाएको भए ऋण तिर्न तयार हुन्थ्ये होला, तर खादै नआएको ऋण बैंकलाई कसरी तिर्नु र ?’ ६४ वर्षीया मगर्नीले भक्कानिदै भनिन् ‘बुढेशकालमा म माथी किन यस्तो अपराध गरियो ?’
२०७८ साल साउन २ गते बर्दिया, बढैयाताल-४ मा रहेको मगर्नीको करिव १२ कठ्ठा जमिनको लालपुर्जा अछाम, साझे नगरपालिका वडा नम्बर १२ का डम्बरबहादुर रावलले मागेका थिए । पीडित मगर्नीका अनुसार सामान्य चिनजान भएका रावलले त्यतिबेला उक्त लालपुर्जा ६ महिना भित्रमा फिर्ता गर्ने शर्तमा लगेका हुन् ।
लालपुर्जा दिए वापत मगर्नीलाई रावलले ५० हजार रुपैयाँ पनि दिएका थिए । ‘जग्गाको लालपुर्जा ६ महिनाभित्रमा फिर्ता आईहाल्छ भने ठिकै छ त भनेर मैले त्यतिबेला लालपुर्जा दिएकी हुँ, यस्तो अपराध गर्लान् भन्ने सोचेको भए मैले दिने नै थिएन्,’ उनले थपिन् ।
लालपुर्जा लिएर गएको केहीदिन पछि रावलले आफुलाई एउटा कागजमा औठा छाप लगाउन पठाएको पनि उनलाई स्मरण छ । तर, रावलले नेपालगन्ज-१ निवासी ३१ वर्षीय पंकजकुमार गुप्तासँग मिलेर किर्ते कागजात तयार गरी ‘दृष्टिबन्धक’ गराएको कुरा आफुले पछि मात्रै थाहा पाएको पीडित मगर्नीले सुनाइन् ।
उक्त जग्गालाई नेपालगन्ज-६ निवासी गुप्ताकी दिदी सासु नाता पर्ने दिपा अधिकारीको नाममा दृष्टिबन्धक गराएका थिए ।
बर्दिया साविक सोरहवा गाविस वडा नम्बर ३ को कि.नं. १३१० को क्षेत्रफल ०,४१६८.०० बर्गमिटरको उक्त जग्गा धितो सरह वार्षिक १२ प्रतिशत ब्याजमा ९ लाख २५ हजार दिलाई बर्दियास्थित मालपोत कार्यालयबाट रावल र गुप्ताले ‘छिनुवा’ पास गराएको पीडितको आरोप छ । रावल र गुप्ता मिलेर सोही जग्गालाई लगत्तै एनआईसी एसिया* बैंकमा धितो राखेर ८५ लाख रुपैयाँ ऋण निकालेको पीडितकी छोरी विष्णुमाया पुनले बताइन् ।
उक्त कार्यमा तत्कालिन मालपोत कार्यालय बर्दियाका प्रमुख र कर्मचारीहरु, बैंकका कर्मचारी लगायतको मिलेमतो रहेको उनको आरोप छ । यस विषयमा प्रतिक्रिया लिदाँ आरोपी गुप्ताले आफ्नो संलग्नतालाई अस्वीकार गरेका छन् । ‘यो घटनामा मेरो संलग्नता छैन,’ गुप्ताले टेलिफोनमा भने ।
तर, पीडित परिवारले धितोमा राखिएको उक्त जग्गालाई ३५ दिनभित्रमा बैंकिङ प्रक्रिया मिलाएर फिर्ता दिलाउँछु भनि आरोपीहरुले कागज गरेको बताएका छन् । जग्गा फिर्ता नगरे प्रचलित मुल्यको आफ्नो चल, अचल सम्पत्तीबाट असुल उपर गरि लिन समेत कागज गरेको पीडितकी छोरी विष्णुमायाले सुनाईन् ।
आफुसँग भएको जग्गा सबै बैंकको नियन्त्रणमा रहेपछि घरबार बिहिन अवस्थामा पुगेको पीडित परिवारको गुनासो छ । उक्त घटनाले परिवारमा समेत अशान्ति मच्चिएको बृद्धा मगर्नीले सुनाइन् ।
(समाचारमा एनआईसि एसिया बैंक हुनुपर्नेमा अन्यथा भएकोमा सच्याइएको छ ।) -सम्पादक
