नेपालगन्ज : नेपाल प्रेस युनियन बाँकेले विभिन्न व्यक्तित्वलाई सम्मान तथा पुरस्कृत गरेको छ । ‘सुशील कोइराला राष्ट्रिय पत्रकारिता सम्मान-२०८०’ बाट वरिष्ठ पत्रकार पुरुषोत्तम दाहाल सम्मानित भए । नेपाल प्रेस युनियन बाँकेको नेपालगन्जमा सम्पन्न १२ औं जिल्ला अधिवेशनको विशेष समारोहमा दाहाललाई उक्त सम्मान प्रदान गरियो ।
कार्यक्रमका प्रमुख अतिथी एवम् नेपाली काँग्रेसका सहमहामन्त्री किशोरसिंह राठौर, नेपाल प्रेस युनियनका केन्द्रीय अध्यक्ष शिव लम्साल, महासचिव दिलिप पौडेल, शाखा अध्यक्ष अर्जुन ओली लगायतले दाहाललाई दोसल्ला ओढाएर सम्मान पत्र तथा र २५ हजार ५ सय ५५ रुपैयाँँको चेक हस्तान्तरण गरेका हुन् ।
नेपाली काँग्रेसका पूर्वसभापति तथा पूर्वप्रधानमन्त्री स्वर्गीय सुशील कोइरालाको स्मृतिमा युनियन बाँकेले तत्कालिन समयमा कोष स्थापना गरेको थियो । पहिलो पुरस्कार यसअघि २०७६ मा वरिष्ठ पत्रकार तारानाथ दाहालले प्राप्त गरेका थिए ।
संविधानसभा सदस्य अब्दुल हमीद सिद्दिकी ‘भोला’ ले तत्कालिन समयमा आफ्नो संसदीय कोषबाट दुई लाख रुपैयाँ पुरस्कार कोषलाई प्रदान गरेका थिए । सोही समारोहमा ‘प्रेस स्वतन्त्रता सेनानी पन्नालाल गुप्ता राष्ट्रिय पत्रकारिता सम्मान-२०८०’ बाट नेपाल टेलिभिजन कोहलपुरका क्षेत्रीय प्रमुख विजय बर्मालाई प्रदान गरियो । उनलाई २१ हजार १ सय ११ रुपैयाँको चेक तथा सम्मान पत्र प्रदान गरियो । पत्रकार बर्माले सोही समरोहमा उक्त चेक ‘प्रेस स्वतन्त्रता सेनानी पन्नालाल गुप्ता राष्ट्रिय पत्रकारिता सम्मान’ को कोष बृद्धिका लागि प्रेस युनियन बाँकेलाई नै प्रदान गरेका छन् ।
यसैगरी ५ हजार ५ सय ५५ रुपैयाँको चेक र सम्मान पत्रसहित ‘जगन्नाथ गौडेल स्मृति पत्रकारिता पुरस्कार’ पत्रकार लोकमाया सुवेदी ‘सुमित्रा’लाई प्रदान गरियो । त्यस्तै ५ हजार ५ सय ५५ रुपैयाँको चेक र सम्मान पत्रसहित ‘प्रेस युनियन सिर्जनशील पत्रकारिता पुरस्कार’ गजे थापालाई प्रदान गरिएको छ । त्यस्तै ४ हजार ५ सय ५५ रुपैयाँको चेक र सम्मान पत्र सहित ‘प्रेस युनियन उदीयमान पत्रकारिता पुरस्कार’ कृष्णराज अधिकारीलाई प्रदान गरियो ।
युनियन बाँकेले स्थापना गरेका ५ वटा सम्मान तथा पुरस्कार छनोटका लागि समिति बनाएको थियो । युनियन बाँकेका पुर्वअध्यक्ष मेघराज ओलीको संयोजकत्वमा गठित समितिको सदस्यमा पुर्वअध्यक्ष नरेन्द्र थापा र निर्वतमान अध्यक्ष जयनारायण शाह सदस्य थिए । अधिवेशनको विशेष समारोहमा समितिका संयोजक ओलीले सम्मानित र पुरस्कृत हुने व्यक्तित्वको नाम घोषणा गरेका थिए ।
युनियनले सम्मान तथा पुरस्कार छनोटका लागि कार्यविधि नै बनाएको छ । कार्यविधि मस्यौदा समितिको संयोजकमा शुक्रऋषि चौलागाई र सदस्यद्धयमा अधिवक्ता लोकबहादुर शाह तथा राकेशकुमार मिश्र रहेका थिए ।
युनियन बाँकेले अग्रज पत्रकार सम्मानबाट पत्रकार हेमन्त कर्माचार्य, प्रेम केसी, नेत्र केसी र श्रीराम सिग्देललाई पनि सम्मान गरेको छ । यसैगरी पूर्वअध्यक्ष सम्मानबाट माधव शाह, मेघराज ओली, नरेन्द्र थापा र जयनारायण शाहलाई सम्मान गरिएको छ । पुरस्कार दाता सम्मानबाट संविधानसभा सदस्य अब्दुल हमीद सिद्दिकी ‘भोला’, नेपालगन्जका पूर्वमेयर विजय गुप्ता र लक्ष्मी गौडेललाई सम्मान गरिएको छ ।
