नेपालगन्ज : नेपालगन्ज उद्योग बाणिज्य संघको निर्वाचनमा भएको मतगणना विवादबारे अदालतले अल्पकालिन अन्तरिम आदेश जारी गरेको छ । उच्च अदालत तुलसीपुर नेपालगन्ज इजलासले सोमबार विपक्षी नेपालगन्ज उद्योग वाणिज्य संघको निर्वाचन गराउन गठित निर्वाचन समिति समेत विरुद्ध यस्तो आदेश जारी गरेको हो ।
संघको महासचिव पदका प्रत्यासी उम्मेदवार टंकप्रसाद शर्माले दायर गरेको रिट निवेदनको सुनुवाई गर्दै अदालतले अल्पकालिन अन्तरिम आदेश जारी गरेको हो । निवेदकले प्रश्न उठाई निवेदन गरेको देखिएकोले यसको बैधानिकता परीक्षण गर्न बाँकी नै रहेको परिप्रेक्ष्यमा सो निर्णय बमोजिम बिपक्षीहरुबाट हुन सक्ने गैर कानुनी कार्य तत्काल रोक्नुपर्ने देखिएकाले यही भदौं १८ गतेसम्मका लागि भदौं ८ गतेको निर्वाचन अधिकृतको निर्णय कार्यान्वयन नगरी यथास्थितीमा राख्न आदेश दिइएको छ ।
भिडियो हेर्नुस् :
यस्तै अदालतले विपक्षी भिमबहादुर रानाभाटलाई नेपालगन्ज उद्योग वाणिज्य संघको महासचिव पदमा निर्वाचित भएको घोषणा नगर्न, प्रमाणपत्र नदिन, सपथ ग्रहण नगराउन, सो पदको हैसियतमा कुनै काम नगर्न नगराउन, निर्वाचन समितिले गरेको काम व्यवहारहरु कार्यान्वयन नगर्न, गणना नभएका र गणना भएका मतपत्रहरु, मुचुल्काहरु सुरक्षित राख्नु र राख्न लगाउन पनि आदेश गरेको छ ।
अदालतको आदेश पश्चात साझा प्रजातान्त्रिक उद्योगी, व्यवसायी समुहले नेपालगन्ज उद्योग वाणिज्य संघको कार्यालयमा लगाएको ताला सोमबार बेलुका खोलेको छ । सो क्रममा प्रजातान्त्रिक उद्योगी, व्यवसायी संघ बाँकेका अध्यक्ष संजय थापाले नेपालगन्ज उद्योग वाणिज्य संघका अध्यक्ष अब्दुल वाहिद मन्सुरीलाई साँचो हस्तान्तरण गरेपछि ताला खोलिएको थियो ।
त्यसक्रममा नेपाली काँग्रेस बाँकेका उपसभापति गोपालप्रसाद अधिकारी, सचिव सुधान्सु कोइराला, संघका पुर्वअध्यक्ष सुनिल शर्मा, संघका अध्यक्ष पदका प्रत्यासी ललितकुमार रौनियार, नवनिर्वाचित उपाध्यक्ष चिरञ्जीवी ओली, उपाध्यक्ष पदकी उम्मेदवार करिष्मा योगी, महासचिव पदका उम्मेदवार टंकप्रसाद शर्मा, संघका नवनिर्वाचित उप-महासचिव टेकबहादुर खड्का, कोषाध्यक्ष मख्खनबहादुर धामी, सदस्य शिव दाहाल, प्रदिपकुमार गुप्ता, उद्योगी व्यवसायी, सञ्चारकर्मी लगायतको उपस्थिती रहेको थियो ।
