नेपालगन्ज : नेपाल प्रहरीको कर्णाली प्रदेश प्रहरी तालिम केन्द्र सुर्खेत, हाल नेपालगन्जबाट आइतबार ३ सय जना जवान दीक्षित भएका छन् । दीक्षान्त समारोहका प्रमुख अतिथी एवम् कर्णाली प्रदेश प्रहरी कार्यालय सुर्खेतका प्रमुख(डिआईजी) भिमप्रसाद ढकालले आधारभुत तालिम प्राप्त प्रहरी जवानलाई दीक्षित गरेका हुन् ।
नेपालगन्जमा प्रहरी जवान आधारभुत तालिम ९-१३९ औं समूह २०७९ कात्तिक २० गतेदेखी सुरु भएको थियो । दीक्षान्त समारोहमा प्रमुख अतिथी(डिआईजी ढकालसँगै बाँकेका प्रमुख जिल्ला अधिकारी विपिन आचार्य, सुर्खेतका प्रमुख जिल्ला अधिकारी नारायणप्रसाद सापकोटा, नेपाल प्रहरी श्रीमती संघ कर्णाली प्रदेश अध्यक्ष श्रीमती बिन्दु अधिकारी ढकाल, सशस्त्र प्रहरी नायव महानिरीक्षक प्रदिपकुमार पाल, अनुसन्धान निर्देशक माधव तिमिल्सिना, नेपाली सेनाका महासेनानी मनोज थापा, कर्णाली प्रदेश प्रहरी तालिम केन्द्रका समादेशक सुशील सिंह राठौर, नेपाल प्रहरी श्रीमती संघ कर्णाली प्रदेश उपाध्यक्ष जानका शाह, जिल्लास्थित सुरक्षा निकायका प्रमुखहरु, स्थानीय तहका प्रमुख तथा प्रतिनिधी, विभिन्न कार्यालयका प्रमुख, सुरक्षा निकायका सिनियर अधिकृत, पूर्वप्रहरी एवम् प्रहरी जवानका अभिभावक लगायतको उपस्थिती रहेको थियो ।
प्रहरी जवान आधारभुत तालिम विभिन्न बिधाको पाँच चरणमा सञ्चालन गरिएको थियो । विभिन्न चरण अन्तरगत पहिलो चरणमा नेपाल तथा नेपाल प्रहरीको परिचय, दोस्रो चरणमा सुरक्षा, तेस्रो चरणमा प्रहरी कार्य तथा अपराध नियन्त्रण, चौथो चरणमा अपराध अनुसन्धान तथा विद्यमान कानून र पाँचौ चरणमा प्रहरी युक्ति तथा कारवाही सम्बन्धि प्रशिक्षण प्रदान गरिएको तालिम केन्द्रका प्रमुख एवम् एसएसपी राठौंरले जानकारी दिए ।
दिक्षान्त समारोहमा तालिम अवधिमा बिभिन्न विधामा उत्कृष्ट स्थान हासिल गर्ने प्रशिक्षार्थी तथा प्रशिक्षण कार्यमा उत्कृष्ट कार्य गर्ने प्रशिक्षकलाई डिआईजी ढकालले पुरुस्कार तथा प्रशंसा पत्र वितरण गरेका थिए ।
तालिममा उत्कृष्ट स्थान सुनिलबहादुर चन्दले हासिल गरेका छन् ।
यस्तै द्वितीय स्थानमा ईश्वर बुढा र तृर्तियमा मिलनराज खनाल रहेका छन् । यसैगरी कवाजतर्फ सन्दिप राम औजी प्रथम, शरीरिक ब्यायाममा धन बोगटी प्रथम, अध्ययनतर्फ ईश्वर बुढा प्रथम, सुनिलबहादुर चन्द चादमांरी प्रथम र प्रहरी कारवाही तथा युक्तिमा अर्जुन बि.क. प्रथम भएका छन् । उनीहरुलाई पुरस्कार वितरण गरिएको तालिम केन्द्रले जनाएको छ ।
तस्बिरहरु : अर्जुन ओली/बिमला चौधरी
