नेपालगन्ज : बाँके राष्ट्रिय निकुञ्ज अन्तरगत पुर्वपश्चिम राजमार्गको जिरोस्थित खैरीपोष्टदेख ओभरीसम्मको १५ किलोमिटर क्षेत्रमा टाईमकार्ड लागु भएको छ । निकुञ्ज कार्यालयले सोमबारबाट उक्त क्षेत्रमा टाईमकार्ड लागु गरेको हो ।
बाँके राष्ट्रिय निकुञ्जका निमित्त वरिष्ठ संरक्षण अधिकृत अर्जुन भुसालका अनुसार त्यसक्षेत्रमा दुर्घटना धेरै बढ्न थालेपछि निकुञ्जले पहिलो चरणमा १५ किलोमिटर क्षेत्रमा टाईमकार्ड लागु गरिएको हो ।
उनका अनुसार राजमार्गमा गुड्ने सवारी साधनले १५ किलोमिटर दुरीलाई २३ देखी २८ मिनेटभित्रमा पार गर्नुपर्नेछ । ‘जंगल क्षेत्र पर्ने र सिधा बाटो भएकाले सवारी साधनहरु तीब्र गतिमा गुड्छन्, जसले गर्दा दुर्घटना धेरै बढेका छन्,’ भुसालले भने ‘बढ्दो दुर्घटनालाई न्युनिकरण गर्नकै लागि हामीले टाईमकार्ड लागु गरेका हौं ।’
ठाउँ ठाउँमा भएका मानव बस्ती र होटलका कारण टाईमकार्ड प्रभावकारी नभएको सूचना अधिकारी समेत रहेका भुसालले सुनाए । ‘यसपटक चरणमा १५ किलोमिटर क्षेत्रमा टाईमकार्ड लागु गरेपनि यसको नतिजा अनुसार क्रमशः अन्यत्र पनि लगाउन सकिन्छ र यसको प्रभाव अन्यत्र पनि पर्छ,’ उनले भने ‘टाईमकार्ड लगाउँदा केही खर्च बढ्छ, कर्मचारीको संख्या बढाउनुपर्छ, राज्यलाई आर्थिक भार चाही पर्छ ।’
बाँके राष्ट्रिय निकुञ्जको नियमावली अनुसार नै टाईमकार्ड लागु गरिएको भुसालले बताए । नियमावलीको नियम १७को (ङ)मा प्रतिघण्टा ४० किलोमिटर सवारी साधन चलाउनुपर्ने ब्यवस्था छ । राजमार्गको निकुञ्ज क्षेत्रमा दुर्घटना अत्यधिक रुपले बढ्न थालेपछि नागरिक अगुवा, ट्राफिक प्रहरी लगायतले टाईमकार्ड लागु गर्न सुझाव दिएका थिए ।
यस्तै जिल्ला स्तरिय ‘वन्यजन्तु अपराध नियन्त्रण एकाई’ बाँकेले पनि असोज १५ गतेबाट १५ किलोमिटर क्षेत्रमा टाईमकार्ड लागु गर्ने निर्णय गरेको थियो ।
