नेपालगन्ज : नेपालगन्ज उपमहानगरपालिका वडा नम्बर ४ निवासी ‘रिगल’ भनिने योगराज ढकालका विषयमा गरिएको कैद मिनाहालाई सर्बोच्च अदालतले बिहीबार दिउँसो बदर गरिदियो । अदालतको आदेश लगत्तै रिगललाई प्रहरीले खोज्न सुरु गरिसकेको थियो, तर प्रहरीले उनी कहाँ बसेका छन् भन्ने पत्ता लगाउन सकेको थिएन ।
रिगल भने आफ्नो घरदेखी करिव २ सय मिटरको दुरिमा रहेको स्थानीय सहिद सेतु बिक चोकस्थित एक घरमा बसेका थिए । अदालतको आदेशलाई सम्मान गर्दै प्रहरी समक्ष आत्मसर्मपण गर्ने उनले निधो गरे र केही सञ्चारकर्मी समक्ष धारणा राख्नका लागि परिवारका सदस्यमार्फत खबर पठाए । सञ्चारकर्मी समक्ष उनले अदालतप्रति आफ्नो सम्मान रहेको र प्रहरीसमक्ष आत्मसर्मपण गर्न लागेको प्रतिक्रिया दिए ।
भिडियो हेर्नुस् :
सञ्चारकर्मीसँग बोले लगत्तै जब उनी निजी गाडी चढेर जिल्ला प्रहरी कार्यालय बाँके पुग्दै थिए, सेतु बिक चोक क्षेत्रमा पहिल्यै तैनाथ रहेको प्रहरीले उनलाई आफ्नो भ्यानमा राखेर जिप्रका पुर्यायो । सेतु बिक चोकमा बाँके प्रहरी प्रवक्ता (डिएसपी) नारायण डाँगीको नेतृत्वमा प्रहरी टोली तैनाथ थियो । सादा पोशाकमा पनि केही प्रहरी तैनाथ थिए ।
आदेश लगत्तै रिगल भाग्न सक्ने प्रहरीलाई डर थियो, तर रिगल अदालतको आदेशलाई सम्मान गर्दै आफै प्रहरीको सम्पर्कमा पुगे । आत्मसर्मपण पश्चात जिल्ला प्रहरी कार्यालय बाँकेका प्रमुख (एसपी) सुभाषचन्द्र बोहराले रिगल आफुहरुको नियन्त्रणमा आईसकेको बताए । नियन्त्रणमा रहेका रिगललाई बिहीबार बेलुकासम्म जिल्ला प्रहरी कार्यालय बाँकेमा राखिएको उनले जानकारी दिए ।
कायममुकायम प्रधानन्यायाधीश ईश्वरप्रसाद खतिवडा, सपना प्रधान मल्ल र कुमार चुडालको इजलासले बिहीबार रिगलको कैद मिनाहा गर्ने निर्णयलाई बदर गर्ने आदेश दिएको हो । नेपालगन्ज निवासी चेतन मानन्धरको हत्या अभियोगमा जेल सजाय काटिरहेका रिगलले सरकारबाट बाँकी कैद माफी पाएका थिए ।
बाँकी कैद माफी पाएर ढकाल संविधान दिवसका दिन छुटेका थिए ।
उक्त निर्णयविरूद्ध चेतन मानन्धरकी श्रीमती भारती मानन्धर शेर्पाले गत असोज २२ गते सर्वोच्चमा रिट दायर गरेकी थिइन् । कैद मिनाहा विरुद्ध उनी काठमाडौको माइतीघर मण्डलामा धर्ना बसेकी थिइन ।
