नेपालगन्ज : जाजरकोट र रुकुम(पश्चिम)का भूकम्प पीडितका लागि बाँकेको बैजनाथ गाउँपालिकाले राहत सामाग्री उपलब्ध गराएको छ । गाउँपालिकाले तत्कालका लागि २ लाख ५० हजार बराबरको राहत सामाग्री जिल्ला विपद ब्यवस्थापन समिति बाँकेलाई हस्तान्तरण गरेको हो ।
राहत सामाग्रीहरुमा २५ थान ठुलो साईजको त्रिपाल र १ सय थान ब्ल्यांकेट रहेको छ । विपद ब्यवस्थापन समितिका संयोजक एवम् बाँकेका प्रमुख जिल्ला अधिकारी श्रवणकुमार पोखरेललाई बैजनाथ गाउँपालिका अध्यक्ष प्रकाशबहादुर शाही, उपाध्यक्ष निर्मला रोकाय र सूचना अधिकारी तप्तराज आचार्यले हस्तान्तरण गरेका हुन् ।
भिडियो हेर्नुस् :
नेपालगन्ज विमानस्थल परिसरमा स्थापना गरिएको अस्थायी गोदाम घरमा उक्त राहत सामाग्री राखिएको छ । राहत सामाग्री हस्तान्तरण गरिसकेपछि अध्यक्ष शाहीले भूकम्पले जनताको ठुलो जनधनको क्षति भएकाले मानवीय धर्म अनुसार बैजनाथले तत्कालका लागि त्रिपाल र ब्ल्यांकेट सहयोग गरेको बताए ।
‘तत्काल राहत उपलब्ध गराउनुपर्छ भनेर हामीले विपद समिति छ, त्यो समितिमा हामीले यस्ता अकस्मात कोषहरु चाही ब्यवस्थापन गरेर राखेका हुन्छौं,’ उनले भने ‘त्यही कोषबाट हामीले तत्काल २ लाख ५० हजार बराबरको जुन ठाउँमा पीडित हुनुहुन्छ, पीडितलाई तत्काल खुल्ला आकाशमा बसिरहनु भएको छ, ठुलो त्रिपाल २५ थान र डबल लेन भएको ब्ल्यांकेट १ सय थान उपलब्ध गराएका छौं ।’
आगामी दिनमा औषधी प्याकेज बनाएर सहयोग गर्ने पनि आफुहरुले वाचा गरेको बताए । तत्कालका लागि भौतिक संरचना बनाउन नसकिने अवस्थामा त्रिपाल र ब्ल्यांकेट आवश्यक पर्ने भएको हुँदा सहयोग गरेको अध्यक्ष शाहीले प्रष्ट्याए ।
‘तत्काललाई आकाश मुनि बस्नु भएका, तत्काल भौतिक संरचना बनाउन नसकिने अवस्थामा उहाँहरुलाई त्रिपाल र ब्ल्यांकेट आवश्यकता पर्छ, त्यसमा प्याकेज बनाएर कार्पेट, कम्बल, सामान्य खाद्यान्न सबै मिक्स गरेर कम्तिमा एक महिनासम्म पुग्ने गरेर पठाउनुपर्छ भनेर सोही अनुसार हामीले ब्ल्यांकेट र त्रिपाल उपलब्ध गराएका छौं,’ उनले थपे ।
बाँकेका प्रमुख जिल्ला अधिकारी पोखरेलले पहिलो चरणमा घाइतेको उपचार सफलता पूर्वक गरिएको र अब दोस्रो चरणमा राहत संकलन गरेर पठाउने काम सुरु भएको बताए । ‘दुई वटा कुरामा बाँके प्रशासनले आफ्नो जिम्मेवारी निर्वाह गर्ने मौका पायो, एउटा घाइतेको उपचार । त्यो उपचार सफलता पूर्वक चलिरहेको यहाँलाई थाहा नै छ,’ उनले भने ‘अब दोस्रो फेजमा हामी यहाँबाट राहतहरु संकलन गरेर राहत प्याकेजहरु भटाभट दुई वटै प्रभावित जिल्लामा पठाउँदैछौं ।’
प्रजिअ पोखरेलका अनुसार राहत सामाग्री हस्तान्तरण गर्नेमा बैजनाथ गाउँपालिका जिल्लाकै पहिलो गाउँपालिका भएको छ । अहिलेसम्म अन्य स्थानीय तह कसैले पनि राहत सामाग्री हस्तान्तरण नगरेको उनले बताए । अन्य गाउँपालिकाले पनि राहत उपलब्ध गराउने घोषणा गरेको र सम्पर्कमा रहेको बताए ।
