जाजरकोट : नेपाल भारत मैत्री संघ केन्द्रीय समितिले भूकम्प प्रभावित जाजरकोट र रुकुम(पश्चिम)का पीडितका लागि राहत सामाग्री हस्तान्तरण गरेको छ । संघका केन्द्रीय पदाधिकारीको टोली पुगेर जाजरकोटस्थित भेरी नगरपालिका वडा नम्बर १ रिम्ना र रुकुम (पश्चिम)मा रहेको आठविसकोट नगरपालिकामा उक्त सामाग्री हस्तान्तरण गरेको हो ।
भिडियो हेर्नुस् :
संघले आठविसकोट नगरपालिकाका ५ सय ६० र जाजरकोट, भेरी नगरपालिका वडा नम्बर १ रिम्नास्थित २ सय ४० घर परिवारलाई राहत सामाग्री हस्तान्तरण गरेको हो । आठविसकोट नगरपालिकाकी नगर उपप्रमुख धनकुमारी शाही र भेरी नगरपालिका वडा नम्बर १ का वडाअध्यक्ष दिपक रानालाई राहत सामाग्री हस्तान्तरण गरिएको थियो ।
संघले पहिलो चरणमा भूकम्प पीडितका लागि करिव १२ लाख रुपैयाँ बराबरको राहत सामाग्री (ब्ल्यांकेट र खाद्य सामाग्री) उपलब्ध गराएको छ । संघका केन्द्रीय वरिष्ठ उपाध्यक्ष सुष्मा शर्मा, महासचिव बोधकृष्ण सुवेदी, संघका केन्द्रीय उपाध्यक्ष एवम् लुम्बिनी प्रदेश अध्यक्ष बासुदेव रिमाल, केन्द्रीय उपाध्यक्ष एवम् कर्णाली प्रदेश अध्यक्ष धनबहादुर बस्नेत, केन्द्रीय सदस्य अमर खड्का, संघको कोहलपुर शाखा सदस्य खिना राना मल्लले राहत सामाग्री हस्तान्तरण गरेका थिए ।
राहत सामाग्री हस्तान्तरण गरिसकेपछि वरिष्ठ उपाध्यक्ष शर्माले एकद्धार प्रणाली अनुसार राहत सामाग्री बाँडिएको बताइन् । रुकुम(पश्चिम) आठविसकोटमा उपमेयरलाई र भेरी नगरपालिका वडा नम्बर १ रिम्नामा वडाअध्यक्षलाई सामाग्री हस्तान्तरण गरिएको उनले जानकारी दिइन् ।
‘हामीले एकद्धार प्रणाली अनुसार नै राहत बाँड्यौं, स्थलगत निरीक्षण गर्ने क्रममा भूकम्प पीडितको अवस्था बुझ्दा राहत यति धेरै आएको छ, प्रत्यक्ष हेर्दाखेरी पाउनु भएको छैन, कसैले धेरै लग्यो, कसैले थोरै लग्यो भन्ने गुनासो छ,’ उनले भनिन् ।
संघका महासचिव सुवेदीले भूकम्पबाट सबैभन्दा बढी मानविय क्षति भएको जाजरकोट र रुकुममा पुगेर राहत हस्तान्तरण गरिएको बताए । ‘पहिलो चरणमा १२ लाख रुपैयाँ बराबरको खाद्य सामाग्री र ब्ल्यांकेटहरु ल्याएर भेरी नगरपालिकाको वडा नम्बर १ रिम्नामा जिम्मा लगायौं, यहाँ २ सय ४० परिवारका लागि र ५ सय ६० परिवारका लागि रुकुम(पश्चिम)को आठविसकोटमा जिम्मा लगाएका छौं,’ उनले भने ।
संघका केन्द्रीय उपाध्यक्ष एवम् लुम्बिनी प्रदेश अध्यक्ष रिमालले प्रभावित क्षेत्रमै पुगेर राहत वितरण गर्न पाउँदा खुसी लागेको बताए । भूकम्प पीडितहरुले खान नपाएको, सुत्न निकै नै अप्ठ्यारो भएको अनुगमनका क्रममा पाइएको बताए । ‘हामीले अनुगमन पनि गर्यौं, अनुगमन गरिसकेपछि राहत पनि दियौं, राहत वितरण गर्न पाउँदा हामी खुसी नै छौं,’ उनले भने ।
संघका कर्णाली प्रदेश अध्यक्ष समेत रहेका केन्द्रीय उपाध्यक्ष बस्नेतले यो राहत पीडामा मल्हम लगाउनका लागि ल्याएर वितरण गरिएको बताए । ‘यो राहत पीडामा मल्हम मात्र हो, यस्तो प्रकोप कहिल्यै नपरोस्,’ उनले भने । संघका केन्द्रीय सदस्य खड्काले भूकम्पछि जाजरकोट र रुकुम(पश्चिम)का जनतालाई गाँस र बासको अप्ठयारो भएको बताए ।
राहत वितरणको काम अझै ब्यवस्थित हुन नसकेको पाइएको उनले सुनाए । ‘पीडितको पीडा त छदैछ, पीडामा मल्हम लगाउने राज्यको दायित्व हो, ब्यवस्थापनको काम फितलो देखिएको छ,’ उनले भने ‘पीडित परिवारलाई राहत पुग्ने कार्यक्रम ल्याउनुपर्छ ।’
संघकी कोहलपुर शाखा सदस्य मल्लले भूकम्प पीडितको एकदमै दर्दनाक स्थिती रहेको बताइन् । ‘घरमा बस्न पाएका छैनन्, बाहिर सितमा पीडादायी रुपले बसेका छन्, बाँचेका परिवारको कुरा सुन्दा आँसु आउँछ,’ उनले भनिन् ।
राहत पाएपछि आठविसकोट नगरपालिकाकी नगर उपप्रमुख शाही र भेरी नगरपालिका वडा नम्बर १ का वडाअध्यक्ष रानाले आफुहरुको पीडामा मल्हम लगाउन नेपाल भारत मैत्री संघले गरेको राहत सहयोगप्रति कृतगता प्रकट गरेका थिए । भूकम्पले जाजरकोट र पश्चिम(रुकुम)बासी निकै पीडामा रहेको उनीहरुले दुखेसो पोखे ।
