नेपालगन्ज : नेपालगन्ज किड्स फेस्टिवलको दोस्रो संस्करण गरिदैछ । बालबालिकामा रहेको अन्तरनिहित प्रतिभालाई उजागर गर्ने उद्धेश्यले फेस्टिवल गर्न लागिएको हो । फेस्टिवलको दोस्रो संस्करण यही मंसिर १६ गते नेपालगन्जमा हुदैछ । फेस्टिवलको दोस्रो संस्करणमा चार वटा विधालाई महत्व दिएर तयारी गरिएको लिभवेल काउन्सिलिङका अध्यक्ष भोजराज शर्मा ‘नादिर’ले जानकारी दिए ।
उनका अनुसार गायन, नृत्य, चित्रकला र वक्तृत्वकला प्रतियोगिता फेस्टिवलका मूख्य आकर्षण हुन् । त्यसबाहेक फेस्टिवलमा सहभागी भएका बालबालिकाले आफुलाई आउने जुनसुकै कुरा पनि प्रदर्शन गर्न पाउनेछन् । हरेक इभेन्ट्समा प्रिस्कुलदेखि लिएर कक्षा १२ सम्मका विद्यार्थीलाई विभिन्न तीन समुहमा विभाजन गरेर प्रतिस्पर्धामा सहभागी गराउने आयोजकको तयारी रहेको छ ।
नृत्यमा एकल र सामूहिक विधा छन् । चित्रकलामा ‘सफा, समृद्ध र रमाईलो गाउँ’ शीर्षकमा ६ देखि १२ कक्षाका विद्यार्थीले प्रतिस्पर्धा गर्नेछन् । वक्तृत्वकला प्रतियोगिताको लागि यस वर्षको शीर्षक ‘समृद्ध नेपालगन्ज, चुनौती र सम्भावनाहरु’ रहेको छ ।
वक्तृताकला प्रतियोगिताका प्रतिस्पर्धीलाई कुशलवक्ता, व्यवसायी एवम् नेपाल सरकारका अधिकृत सन्तोष खड्काले प्रशिक्षण दिइरहेका छन् । कात्तिक १८ गते भएको पहिलो चरणको अडिसनमा २ सय २७जनाले भागलिएकाथिए । अन्तिम चरणको अडिसनमंसिर ५ गते हुँदैछ ।
बाल साहित्य र सिर्जनाको खुला उत्सवको रुपमा रहेको नेपालगन्ज किड्स फेस्टिवलमा गतवर्ष ४ सय ७० जना बालबालिकाको सहभागिता रहेको थियो । यसपटक फेस्टिवललाई अझै फरक र व्यवस्थित ढंगले आयोजनागर्ने तयारी गरेको शर्माले बताए ।
‘परम्परागत रुपमाभन्दाहामी केही फरक गर्ने प्रयास गरिरहेका छौं, सबै बालबालिकालाई एउटा रमाईलो मेलाको रुपमा लाग्ने गरी उनीहरुको सृजनशीलतातर्फ आकर्षित गर्ने हो, आफ्नो देशको माटोको माया चिनाउने प्रयास हो, यसमा करिव एक हजार बालबालिकालाई सहभागी गराउने लक्ष्य रहेको छ,’ उनले भने ।
फेस्टिवलमा अभिभावकले आफ्ना बालबालिकालाई नृत्य, गायन, चित्रकला, वक्तृत्वकला मध्ये कुनै एक विधामा सहभागी गराउने सक्नेछन् । फेस्टिवलमा हुने मनोरञ्जनात्मक प्रदर्शनी, खेल, साँस्कृतिक पोषाक, फोटो सेसन, पुस्तक, चित्रकला प्रदर्शनीबाट बालबालिकाले धेरै कुरा सिक्ने अवसर पाउने आयोजकको दाबी छ ।
