काठमाडौं : नेपाली कांग्रेसका नेता किशोरसिंह राठौरले पार्टीको सभापतिमा उम्मेदवारी दिने घोषणा गरेका छन् । काठमाडौंको रिपोर्ट्स क्लबमा मंगलबार पत्रकार सम्मेलन गर्दै पुर्वसहमहामन्त्री समेत रहेका राठौरले नेपाली कांग्रेसलाई नयाँ पुस्तासहित सबैको कांग्रेस बनाउने उद्देश्यले सभापतिमा उम्मेदवारी घोषणा गरेको जिकिर गरे ।
कांग्रेसमा विगतमा योगदान दिएका नेताहरूका सन्तान मात्र कांग्रेस हुने अवस्था नरहेको भन्दै नयाँ पुस्तालाई पनि पार्टीमा नेतृत्व र योगदान गर्ने अवसर दिनुपर्ने उनले बताए । ‘बीपी कोइरालाको छोरा मात्रै कांग्रेस होइनन्, गणेशमान सिंहको छोरा मात्रै कांग्रेस होइनन्, नारायणनिधिको छोरा मात्रै कांग्रेस होइनन्, नोना कोइरालाको छोरा मात्रै कांग्रेस होइनन,’ राठौंरले भने, ‘पुरानो पुस्ताले पार्टीमा लगानी र योगदान गर्नुभएको छ । अब सबैलाई मिलाएर नयाँ पुस्ता नेतृत्वमा आउन सक्ने वातावरण बनाउनुपर्छ ।’
नेता राठौरले कांग्रेसलाई हरेक नेता तथा कार्यकर्ताले ‘यो मेरो कांग्रेस हो, मेरो पार्टी हो, हाम्रो पार्टी हो’ भनेर अपनत्व महसुस गर्ने पार्टी बनाउनुपर्ने बताए । त्यसका लागि कांग्रेसलाई निरन्तर सबैको कांग्रेस बनाउने अभियानमा आफू लागेको उनको भनाइ थियो । कांग्रेसको १५औँ महाधिवेशनलाई नेता तथा कार्यकर्ताका लागि उत्सव र पर्वका रूपमा मनाउनुपर्ने बताए ।
कांग्रेसको लामो इतिहास र योगदानलाई स्मरण गर्दै उनले पार्टीले देशमा जनताको अधिकार स्थापित गर्न, विकास अघि बढाउन र शान्ति कायम गर्न महत्वपूर्ण भूमिका खेलेको बताए । राठौरले बीपी कोइराला, सुवर्णशमशेर, गणेशमान सिंह, कृष्णप्रसाद भट्टराई, गिरिजाप्रसाद कोइराला, सुशील कोइराला, शेरबहादुर देउवा र रामचन्द्र पौडेललगायत नेताहरूले कांग्रेसको नेतृत्व गरेको स्मरण गरेका छन् । आफु सभापतिमा निर्वाचित भएपछि सबै पक्षलाई समेटेर कांग्रेसलाई एकताबद्ध बनाउने उनले बताएका छन् ।
ने।
