बाँके(कुसुम) : राप्तीको बाढीले क्षति पुर्याएको झोलुंगे पुल मर्मत नगरिदाँ दुर्घटनाको जोखिम बढेको छ । राप्ती सोनारी गाउँपालिका वडा नम्बर १ कुसुमस्थित बासखोली-भवानियापुर जोड्ने झोलुंगे पुलमा २०७९ असोजमा आएको बाढीले क्षति पुर्याएको थियो ।
झोलुंगे पुलमा क्षति पुगेको एक वर्ष बितिसक्दा पनि अहिलेसम्म मर्मत गर्नमा बेवास्ता गरिएको यहाँका स्थानीय बासिन्दाले गुनासो गरेका छन् । राप्तीपारी भवानियापुर गाउँका स्थानीय मोहनराज डाँगीले क्षतिग्रस्त झोलुंगे पुलको अवस्था अत्यन्त दयनीय रहेको र जुनसुकै बेलामा पनि पुल खस्ने अवस्थामा पुगेको बताए ।
डाँगीले दूरसञ्चार डटकमसँग भने, ‘बाढीले गर्दा झोलुंगे पुलका तारहरु(लठ्ठा) चुडिएका छन्, बाढीले बगाएको रुख पुलमै आएर अड्किएको छ, पुलका प्लेटहरु पनि मान्छे खस्ने जस्ता भएका छन्, कुन दिन पुल नै खसेर ठुलो मानवीय क्षति हुने अवस्था छ ।’ बाढीका कारण बांगिएको उक्त झोलुंगे पुल अझैपनि मर्मत नभए थप क्षति हुने उनले बताए ।
पुल मर्मतका लागि राप्ती सोनारी गाउँपालिका वडा नम्बर १ कार्यालयले विभागमा पटक–पटक पत्र पठाएपनि वास्ता नभएको जनाएको छ । राप्ती सोनारी १ का वडाअध्यक्ष यमबहादुर खड्काले क्षतिग्रस्त पुल मर्मत गरिदिन ४/५ पटक जति पत्र पठाइसकेको सुनाए । ‘क्षतिग्रस्त पुल हेर्न सांसदहरु आउनु भयो, गाउँपालिकाबाट पनि अध्यक्ष आएर हेर्नुभयो, दुई पटक झोलुंगे पुल शाखाका प्रविधिकहरु आएर फर्के,’ उनले भने ‘गतवर्ष मर्मत गर्नलाई पैसा छैन भन्यो, यो वर्षपनि मर्मत हुने छाँट छैन ।’
पुलको दुबैतिरका तारलाई बाढीले चुडाएका कारण जतिबेला पनि पुल खस्न सक्ने अवस्था रहेको वडाअध्यक्ष खड्काले सुनाए । उनले थपे, ‘वडा कार्यालयले गर्नुपर्ने पहल गरेको हो, तर हाम्रो मेहेनतको कतैबाट पनि सुनुवाई भएन ।’ हिड्नै नमिल्ने पुलबाट मान्छेहरु बाध्यताले ओहोर-दोहोर गर्नु परिरहेको वडाअध्यक्ष खड्काले बताए ।
उक्त झोलुंगे पुल भएर राप्ती सोनारी गाउँपालिका वडा नम्बर १ भवानियापुर, खुटी गाउँ लगायत सहित दाङ राजपुर गाउँपालिकाको भौवा, भैसाही तथा भारतबाट समेत ठुलो संख्यामा तिर्थयात्रीहरु आवत–जावत गर्छन् । पुलमा बाढीले क्षति गरेपछि नाजुक अवस्थामा आवत-जावत गर्नु परिरहेको अर्का स्थानीय मनोज बैश्यले बताए ।
संघ र प्रदेशका सांसदले निर्वाचनका बेला आफ्नै आँखाले देखेको पुलको दुरावस्थालाई अहिले बेवास्ता गरेको उनको गुनासो छ । ‘आफ्नै क्षेत्रका सांसदले वास्ता गरेनन्, मर्मत गर्ने निकायले पनि बेवास्ता गर्यो, हामी जनताले कहाँ गएर कस्लाई भन्ने ? वाक्क दिक्क भएर मिडियालाई गुहारेका हौं,’ उनले भने ।
शहरी विकास मन्त्रालयको स्थानीय पुर्वाधार विभाग अन्र्तगत झोलुंगे पुल डिभिजनका इन्जिनियर प्रवेश रेग्मीले बाँकेको कुसुमसहित देशका अन्य ठाउँका झोलुंगे पुलहरु मर्मत गर्न प्राविधिक टोली पुगेर स्टिमेट गरेपनि बजेटकै कारण गतवर्ष कामहरु रोकिएको बताए । ‘बाँकेको त्यो झोलुंगे पुल पनि हेरेर प्राविधिक टोली फर्केका हुन्, गतवर्ष नयाँ निर्माण र मर्मतको कुनै काम भएनन्, अर्थ मन्त्रालयले सहमती दिएन,’ उनले भने ।
शहरी विकास मन्त्रालयको स्थानीय पुर्वाधार विभाग अन्र्तगत स्थानीय पुर्वाधार विकास आयोजना कार्यालय बुटवलले लुम्बिनी प्रदेशभित्र रहेका झोलुंगे पुलहरु हेर्ने गरेको छ । आयोजना कार्यालयका इन्जिनियर राजु थापामगरले आफुहरु बाँकेमा पुगेर बाढीले क्षति गरेको झोलुंगे पुलको निरीक्षण गरेर स्टिमेट समेत तयार गरेको सुनाए । उनले भने, ‘स्टिमेट तयारी अवस्थामा थियो, तर बजेटमा अर्थ मन्त्रालयले सहमती नदिदाँ काम हुन सकेन ।’
