बाँके (फत्तेपुर) : बर्खायाममा हिलाम्य र हिउँदमा धुलाम्य हुने सडक आफ्नै आँखा अगाडी कालोपत्रे भएपछि दंग परेका बाँके, फत्तेपुरका मल्लबहादुर रोकाक्षेत्री अहिले भने चिन्तामा छन् । कालोपत्रे सडक भएर दैनिक रुपमा सयौंको संख्यामा नदीजन्य सामाग्रीहरु ओभरलोड बोकेका टिपरहरु पानी चुहाउँदै गुड्छन् ।
एकाबिहानै देखी राती अबेरसम्म टिपरले चुहाएको पानी सडकभरी रहन्छ । जसले गर्दा सडकको गुणस्तर चाडै खस्किएर भत्किने हो कि भन्ने चिन्ताले स्थानीय बासिन्दालाई सताएको छ । ‘बाटो जब पिच भयो, त्यसपछि ओभरलोड बोकेका टिपरहरु पानी चुहाउँदै गुड्न थालेका छन्,’ रोकाक्षेत्रीले भने ‘यसरी पानी चुहाउँदै टिपर गुड्ने हुन भने यो सडक धेरै दिन टिक्दैन ।’
भिडियो हेर्नुस् :
पिपल चौतारा टोल विकास संस्थाका अध्यक्ष समेत रहेका उनले भर्खरै बनेको कालोपत्रे सडकमा टिपर आतंक बढेपछि आफुहरुले रोक्न खोजेको बताए । तर, नदी खोलामा ठेक्का लिने र नजिकैको क्रसर उद्योग चलाउने ब्यक्तीहरु ठुलाबडा भएकाले यो आतंक रोकिनेमा स्थानीयलाई आशंका छ । रोकाक्षेत्रीले थपे, ‘यो काममा ठुलाबडा छन्, सबै ठुला बडाकै हात छ ।’
पानी चुहाउँदै गुड्ने, ओभरलोड बोक्ने, तीब्र गतिमा जथाभावी रुपमा चल्ने टिपरको आतंक बन्द गर्न माग गर्दै उक्त टोल विकास संस्थाले वडा नम्बर ६ को कार्यालयमा निवेदन पेश गरेको छ । उक्त संस्थाले टिपर आतंक रोक्नका लागि पहल गरिदिन वडा कार्यालयलाई लिखित रुपमा अनुरोध नै गरेको हो ।
‘हाम्रो सबैभन्दा नजिक रहेको सरकार वडा कार्यालय हो, सडकको सुरक्षाका लागि हामीले वडा कार्यालयलाई निवेदन दिइसकेका छौं, वडाले आफ्नो तर्फबाट आवश्यक पहल गर्ने हामीलाई विश्वास छ,’ अध्यक्ष रोकाक्षेत्रीले भने ।
हुलाकी सडक निर्देशनालयले राप्ती सोनारी गाउँपालिका वडा नम्बर ३ नारायणपुरदेखी वडा नम्बर ६ फत्तेपुरको कुण्डाचोकसम्म हालै ‘अस्फाल्ट’ प्रविधिको सडक कालोपत्रे गरेको थियो । निर्देशनालयले उक्त सडकमा अहिले पनि निर्माण कार्य गरिरहेको छ ।
ठेकेदार कम्पनीले सडक हस्तान्तरण गर्न नपाउँदै दैनिक रुपमा सयौंको संख्यामा गुड्ने टिपरले पानी चुहाउँदै नदीजन्य सामाग्री बोक्न थालेपछि सडकको गुणस्तर कमजोर हुने स्थानीयको बुझाई छ । राप्ती सोनारी गाउँपालिकाले ठेक्का लगाएर केही महिनाअघि नदी तथा खोलाबाट सामाग्री उत्खनन गर्न अनुमति दिएपछि हुलाकी सडकमा टिपर तथा ट्याक्टरको चाप अहिले बढी देखिन्छ ।
फत्तेपुरस्थित खल्ला टेपरीका स्थानीय अमरबहादुर बुढाले नयाँ बनेको कालोपत्रेमा पानी, माटो, बालुवा तथा ग्राभेल खसेर सडकको स्वरुप नै बिगारेको बताए । ‘पानी चुहाउँदै नदीजन्य सामाग्री बोकिरहेका छन्, त्यसकारण भर्खरै बनेको पिच सडक भत्किने हो कि भन्ने चिन्ता हामीलाई छ,’ खल्ला टेपरी टोल विकास संस्थाका अध्यक्ष बुढाले भने ।
तीब्र गतिमा गुड्ने सवारी साधनका कारण सडक दुर्घटना निम्तिने खतरा पनि बढेको उनले सुनाए । ‘यो समस्या हामीले वडा कार्यालयसम्म पुर्याएका छौं, अब वडाले यो समस्या समाधान गर्छ भन्ने विश्वास छ,’ बुढाले भने । हुलाकी सडक भएर गुड्ने टिपर र ट्याक्टरले नदीजन्य सामाग्री नियम विपरित नै ओसार–पसार गरेको स्थानीयको आरोप छ ।
नियम विपरित सामाग्री ओसार्दा पनि प्रहरी र ट्राफिक प्रहरीले कारबाही नगरेको उनीहरुको गुनासो छ । ढलैया टोल विकास संस्थाका भुपेन्द्र विष्टले हुलाकी सडक खण्डमा नदीजन्य पदार्थ नियम विपरित नै ओसार–पसार भइरहेको बताए । भर्खरै कालोपत्रे भएको सडकमा पानी चुहाउँदै नदीजन्य सामाग्री ढुवानी भएकाले सडक सुरक्षा गरिदिनुपर्ने उनको माग छ ।
राप्ती सोनारी गाउँपालिका वडा नम्बर ६ का वडाअध्यक्ष लवराज खरेलले नदीजन्य सामाग्रीको ठेक्का खुलेपछि टिपर तथा ट्याक्टरको चाप स्वभाविक रुपले बढेको बताए । ढुवानीका साधनले सडकमा पानी चुहाउने गरेको भनि विभिन्न टोल विकास संस्थाबाट निवेदन आएको उनले सुनाए ।
‘भर्खरै बनेको कालोपत्रे सडकमा पानी चुहाएर नदीजन्य सामाग्री बोक्दा सडकको गुणस्तर खस्किने हो की भन्ने चिन्ता उहाँहरुलाई छ,’ खरेलले भने ‘ब्यवसायी पनि सुरक्षित हुनुपर्यो, बाटो पनि सुरक्षित हुनुपर्यो भन्ने हामीलाई लागेको छ ।’
सडकमा पानी चुहाउने, ओभरलोड बोक्दा नदीजन्य सामाग्री बाटोमै खसाल्ने, तीब्र गतिमा गुडाउने समस्या समाधानका लागि स्थानीय प्रहरी र ट्राफिक प्रहरीलाई आफुले जानकारी गराईसकेको उनले बताए । ‘यसको नियमन गर्ने काम ट्राफिक प्रहरीको हो, हाम्रै वडामा ट्राफिकले चेकजाँच त गर्छ, तर यसमा ट्राफिकको ध्यान नपुगेको हो की ?’ वडाअध्यक्ष खरेलले भने । समयमै समस्या समाधान गर्न नसके राज्यले करोडौं लगानीमा बनाएको कालोपत्रे सडक नरहने अवस्था आउन सक्ने उनले सुनाए ।
