नेपालगन्ज : विपन्न परिवारका राजु खानले मजदुरी गरेर भएपनि जसोतसो दैनिक खर्च जोहो गरिरहेकै थिए । उनको जीवनमा अकस्मात एउटा बज्रपात आईपर्यो । करिव ८ वर्षअघि गम्भिर बिरामी भएर उनी थला परे । पेन्टरको काम गर्ने गरेका खानको रोजीरोटी सबै गुम्यो ।
दायाँ खुट्टामा एक्कासी रक्तसञ्चार बन्द भयो । त्यसपछि खुट्टामा घाउ देखियो । अस्पतालमा गएर उपचार गराउने क्रममा चिकित्सकले क्यान्सर भएको भन्दै खुट्टा नै काटेर फाल्नुपर्ने सुझाव दिए । खुट्टा काटेर फालेपछि उनी अपांगता भए । ‘ब्लड सर्कुलेसन नभएर मेरो खुट्टामा घाउ भयो र क्यान्सर भयो,’ विगतलाई सम्झिदै भने ‘क्यान्सर भईसकेको अवस्थामा खुट्टा काट्नुको विकल्प रहेन ।’
भिडियो हेर्नुस् :
अपांगता भएपछि पहिलाको जस्तो सहज रुपले काम गर्न सक्ने भएनन् । एकातिर परिवारभित्रको चरम गरिबी, अर्कोतर्फ सबैको हेरविचार गर्ने आफु नै अपांगताको अवस्थामा पुगेपछि परिवारको बिचल्ली हुन थाल्यो । केही वर्षदेखी जसोतसो अर्काको इलेक्ट्रीक रिक्सा भाडामा लिएर भएपनि उनले चलाए । त्यही रिक्साको कमाईले परिवारको दैनिक खर्च र कोठा भाडा तिर्न पुग्यो ।
खानको दयनीय अवस्थालाई प्रत्यक्ष रुपमा देखेका स्थानीय समाजसेवी प्रदिप साहुको मन छोयो र केही सहयोग गर्ने भावना पलायो । अन्ततः प्रदिप नै संरक्षक रहेको ‘गौरव स्मृति तथा वि योर फाउण्डेशन’ मार्फत खानले शुक्रबार इलेक्ट्रीक रिक्सा पाएका छन् । औपचारिक कार्यक्रमका बीच प्रमुख अतिथी समेत रहेका नेपालगन्ज उपमहानगरपालिकाका मेयर प्रशान्त विष्टले रिक्सा हस्तान्तरण गरे ।
दुई लाख २० हजार मुल्य बराबरको इलेक्ट्रीक रिक्सा निःशुल्क रुपमा पाउँदा खान हर्षित मुद्रामा देखिन्थ्ये । ‘क्यान्सरले मलाई अपांगता बनायो, गरिखाने बाटो रोक्यो,’ उनले भने ‘प्रदिप दाईले इलेक्ट्रीक रिक्सा दिनुभयो, अब गर्ने खाने बाटो भयो, रिक्सा पाउँदा धेरै खुसी लागेको छ ।’
कृत्रिम खुट्टाको सहायताले हिडडुल गर्ने खान आफ्नो समस्या र पारिवारीक अवस्था देखाएर सहयोग माग्न धेरै ठाउँमा पुगे । उनी जहाँ पुगे सरकारी निकाय कसैले पनि सहयोग गरेनन् । ‘एउटा खुट्टा छैन, अपांग छु,’ खानले भने ‘नगरपालिका र वडा कार्यालयले एउटा खुट्टा नभएकोलाई सहयोग हुदैन भनेर फर्काए,’ उनले सुनाए । खानको घरमा श्रीमतीसहित दुई छोरी र बृद्ध बुवाआमा छन् ।
समाजसेवी प्रदिपले आफ्ना स्वर्गिय छोरा गौरवको स्मृतिमा कोष स्थापना गरेर उक्त फाउण्डेशन सञ्चालन गरिरहेका छन् । उनका अनुसार गौरव जिवित रहँदा पनि ‘वि योर फाउण्डेशन’ चलाउने गरेका थिए । फाउण्डेशनले दुःखी, गरिव तथा असहायलाई विभिन्न सहयोग गर्दै आएको थियो । गौरवको असामयिक निधन पश्चात छोराले थालेको सामाजिक कामलाई प्रदिपले सोही फाउण्डेशनमार्फत निरन्तरता दिदै आएका छन् ।
प्रदिपले स्वर्गिय छोरा गौरवको जन्मदिनको अवसरमा आर्थिक अवस्था कमजोर भएका नेपालगन्ज ५ निवासी खानलाई निःशुल्क रुपमा इलेक्ट्रीक रिक्सा प्रदान गरिएको बताए । ‘हामीले अक्षयकोष खडा गरेका थियौं, सोही कोषमार्फत गरिव तथा विपन्न परिवारका राजु खान जसको एउटा खुट्टा नै छैन,’ उनले भने ‘नेपाल सरकार र स्थानीय सरकारले पनि नहेरिरहेको अवस्थामा हामीले दयनीय अवस्था देखेर सहज रुपले जीवनयापन होस् भनेर सहयोग गरेका हौं ।’
फाउण्डेशनले गरेको सहयोग यो पहिलो भने होईन् । गतवर्ष पनि फाउण्डेशनले कोहलपुरका स्वर्गिय पत्रकार लक्ष्मणराज सापकोटाको परिवारलाई सम्मान गरेको थियो । स्वर्गिय सापकोटाकी पत्नी देवकी सापकोटालाई नगद ११ हजार १ सय ११ रुपैयाँ र सम्मानपत्र सहित सम्मान गरेको थियो । विपन्न परिवारका सापकोटाका छोरा छोरीको शिक्षा दिक्षामा सहयोग पुगोस् भन्ने हेतुले सहयोग गरिएको हो ।
फाउण्डेशनले निःशुल्क रुपमा स्वास्थ्य शिविर, गरिव तथा विपन्नलाई खाना खुवाउने, बालबालिकालाई विभिन्न सहयोग जस्ता सामाजिक काम गर्दै आएको छ । नेपालगन्ज उपमहानगरपालिका वडा नम्बर ४ निवासी गौरवको २०७८ असार १ गते निधन भएको थियो । फाउण्डेसनका संरक्षक प्रदीप साहुले गौरवको नाममा ८ लाख रुपैयाँको अक्षय कोष स्थापना गरी सामाजिक कार्यलाई निरन्तरता दिदै आएका छन् ।
