बाँके(कुसुम) : राप्ती सोनारी गाउँपालिका -१ कुसुमस्थित (बर्दापुर)मा रहेको शिद्देश्वर महादेव माध्यामिक बिद्यालयका विद्यार्थी (छात्रा) मा अनौठो लक्षण देखिएको छ । उक्त बिद्यालयको कक्षा ७ मा पढ्ने ४ जना र कक्षा १० मा पढ्ने एक जना छात्रामा चिच्याउने, बर्बराउने, अर्धअचेत हुने, मुर्छा पर्ने लगायतका लक्षणहरु देखिएको हो ।
बिद्यालयका प्रधानाध्यापक आदित्य जिसीले ५ जना छात्रामा अनौठो लक्षण देखिएको जानकारी दिएका छन । छात्राहरुमा उक्त लक्षण देखिएपछि आइतबार बिद्यालयको पठन-पाठन नै प्रभावित भएको छ । बिद्यालयका छात्राहरुमा देखिएको लक्षण र उपचारका विषयमा राप्ती सोनारी गाउँपालिका कार्यालयलाई समेत जानकारी गराइसकेको प्रअ जिसीलेे बताए ।
'डाक्टर साबहरु आएर पनि उपचार गर्नु भयो,' उनले भने । जिसीका अनुसार बिद्यालयका एक जना छात्रामा गत शुक्रबार पनि यस्तै लक्षण देखिएको थियो । तर, यसलाई बिद्यालयले सामान्य रूपमा लिएको थियो । 'गत शुक्रबार पनि एक जना छात्रामा मात्रै चिच्याउने, बर्बराउने, अर्ध अचेत हुने, मुर्छा पर्ने समस्या देखिन्थ्यो, अहिले त एकै पटक पाँच जना छात्रामा देखियो,' प्रअ जिसीलेे भने ।
उक्त बिद्यालय बाँके र दाङको सिमा क्षेत्र शिवखोला नजिक पर्दछ । स्थानीय समाजसेवी समेत रहेका बिद्यालयका पुर्बप्रधानाध्यापक रुद्रबहादुर ओलीले छात्रामा देखा परेको अनौठो लक्षणले बिद्यार्थी, अभिभावक तथा शिक्षकमा त्रासको वातावरण सिर्जना गरेको बताए । 'हाम्रो स्कुलमा बडो अचम्मको घटना भयो,' ओलीले भने ।
