नेपालगन्ज : पछिल्ला दिनमा बाँकेमा लगातार भएका अपराधिक घटनाबाट आमनागरिकको शान्ति सुरक्षामा खलल पुगीरहेको घटनाप्रति नेपालगन्जका मानवअधिकारकर्मीले गम्भिर ध्यानाकर्षण भएको जनाएका छन् । उल्लेखित घटनाले आमनागरिकको बाँच्न पाउने नैसर्गिक अधिकारमा खलल पुग्न गएको भन्दै उनीहरुले सम्बन्धित निकायको ध्यानाकर्षण गराउन गराएका छन् ।
नेपालगन्ज उपमहानगरपालिका वडा नम्बर २१ बिर्ता गाउँका २२ वर्षीय एक युवकलाई यही चैत्र १८ गते घाँटी रेटेर हत्या गरिएको अवस्थामा शव फेला परेको घटना, होलीपर्वको बेला भएका झडप, दिन दहाडै भएका हत्याका अन्य अपराधका घटनाले नागरिकको जिउँ ज्यान र धनको सुरक्षामा गम्भीर असर पारेको उनीहरुको ठहर छ । ‘नेपालगन्ज, खजुरा लगायतका क्षेत्रमा भएका हत्या हिंसाका घटनाले स्वतन्त्रपुर्वक, भयरहीत बातावरणमा बाँच्न पाउने नागरिकको संवैधानिक अधिकार उपभोगमा असर पर्दै गएको छ,’ अपिलमा भनिएको छ ।
राज्यका तर्फबाट शान्ति सुरक्षाको जिम्मेवारी लिएका स्थानीय प्रहरी प्रशासनले आम नागरिकको शान्ति सुरक्षाप्रति चनाखो हुन र अपराधिक घटनामा सम्लग्न व्यक्ति, समूहको पहिचान गरि कानूनी दायरामा ल्याई पीडकलाई कारबाही र पीडितलाई न्याय दिन अपिल गरिएको छ । साथै समाजमा मानवअधिकार उल्लंघन तथा ज्यादतीका घटना हुन नदिन राज्यका सुरक्षा संयन्त्रलाई थप चनाखो हुन र प्रभावकारी भूमिका निर्वाह गर्न समेत अनुरोध गरिएको छ ।
अपिल जारी गर्नेहरुमा नेपाल बार एशोसिएसनका पूर्वउपाध्यक्ष एवम् वरिष्ठ अधिवक्ता सुनिलकुमार श्रेष्ठ, नेपालगन्ज उच्च अदालत बार एशोसिएसनका अध्यक्ष चित्रबहादुर शाही, अनौपचारिक क्षेत्र सेवा केन्द्र इन्सेकका लुम्बिनी प्रदेश संयोजक भोला महत, एड्भोकेसी फोरम नेपालका वरिष्ठ प्रदेश संयोजक बसन्त गौतम, सुचना र मानव अधिकार अनुसन्धान केन्द्रका अध्यक्ष विश्वजित तिवारी, मानव अधिकार एलाइन्सका केन्द्रिय सदस्य प्रभातकुमार ठकुरी, सामाजिक लोकतन्त्र अध्ययन केन्द्र बाँकेका संयोजक बलबहादुर चन्द र जिल्ला अदालत बार एशोसिएसनका पुर्वअध्यक्ष केवल सिंह थारु रहेका छन् ।
यो पनि पढ्नुस् :
किन खस्कियो बाँकेको शान्ति सुरक्षा ?
नेपालगन्जको विर्तामा युवकको हत्या
