बर्दिया (ठाकुरद्धारा) : आफ्नै बिद्यालय परिसरमा हलिउडका चर्चित नायक ‘लियोनार्दो डि क्याप्रियो’ ले रोपेको ‘राजवृक्ष’ प्रजातीको रुख छ । कुनैबेला हलिउडका नायकले बर्दिया ठाकुरद्धारामा बिरुवा रोपेको विषयले नेपालमा मात्र होईन, विश्वभर नै चर्चा पायो । तर, आफ्नै बिद्यालय परिसरमा यति महत्व बोकेको रुख छ भन्नेमा यहाँ अध्ययनरत छात्र छात्रा नै अनविज्ञ छन् ।
बर्दियाको पर्यटकीय क्षेत्र ठाकुरद्धारास्थित जगदम्बा माध्यामिक बिद्यालय मढेलाको परिसरमा हलिउड नायक लियोनार्दोले १४ वर्षअघि अर्थात् सन् २०१० मा उक्त बिरुवा रोपेका थिए । उक्त बिद्यालयको कक्षा ११ र १२ मा अध्ययनरत अधिकांस छात्रा छात्राले भने हलिउडका नायकले विरुवा रोपेको बारेमा अनविज्ञता प्रकट गरे ।
‘हलिउडका नायकले हाम्रो बिद्यालयमा बिरुवा रोपेको कुरा थाहा छैन,’ छात्र छात्राले भने ‘हामीलाई बिद्यालयमा कसैले पनि यसबारेमा जानकारी दिनु भएको छैन ।’ बिद्यालय परिसरमा रुख छ भन्ने कुराको जानकारी पाएपछि कतिपय छात्र छात्रा दंग परे । कक्षा १ देखी नै सोही बिद्यालयमा अध्ययनरत एक छात्राले आफुले अहिलेसम्म रुखका बारेमा जानकारी नपाएको प्रतिक्रिया दिईन् । ‘कक्षा १ देखी नै म यो स्कुलमा पढिरहेकी छु, अहिले कक्षा १२ मा पढ्छु, तर अहिलेसम्म कसैले पनि हाम्रो बिद्यालयमा हलिउड नायकले रोपेको रुख छ भनेको थिएन,’ उनले भनिन् ।
उक्त रुखले राम्ररी स्याहार नपाएको कुरा त्यसको अवस्थाले नै चित्रण गरेको छ । तत्कालिन समयमा ठाकुरद्वारामा तीन दिनको बसाईका क्रममा बाघप्रेमी हलिउड नायक लियोनार्दोले उक्त विद्यालयमा राजवृक्ष रोपेका थिए । उक्त रुखप्रति आन्तरिक तथा बाह्य पर्यटकले चासो देखाएपनि बिद्यालय प्रशासन र ब्यवस्थापन समितिले भने बेवास्ता गरेको पाइएको छ । अधिकांश छात्र र छात्रालाई आफ्नै विद्यालय परिसरमा हलिउड नायकले रोपेको रुखका बारेमा जानकारी नहुनु दुःखद भएको संरक्षणकर्मी बताउँछन् ।
संरक्षणकर्मी भन्छन्, ‘बिद्यालयका विद्यार्थीलाई बिद्यालय प्रशासन र ब्यवस्थापन समितिले यति महत्वपूर्ण विषयमा जानकारी नगराउनु दुःखद कुरा हो, यो बिद्यालयमा शिक्षकले बिद्यार्थीलाई पढाईका अतिरिक्त अन्य के के कुराको जानकारी दिदाँ रहेछन् भन्नेमा छर्लङ्ग हुन्छ ।’
वातावरण पत्रकार सुवोध गौतमले बिद्यालयले आफ्ना बिद्यार्थीलाई रुखको महत्वका बारेमा जानकारी दिन नसक्नु दुःखद कुरा भएको बताए । ‘यही विरुवालाई देखाएर पनि आन्तरिक तथा बाह्य पर्यटकलाई बिद्यालयले प्रचार गर्न सक्छ,’ वातावरणका क्षेत्रमा दशकौंदेखी कलम चलाउँदै आएका नेचर मिडिया नेटवर्कका कार्यकारी निर्देशक गौतमले भने । अर्का वातावरण पत्रकार पिताम्बर सिग्देलले बिद्यालयको नाम हलिउड नायकका कारण देश तथा विदेशमा प्रचार भएपनि बिद्यालय आफैले 'ब्राण्डिङ' गर्न नसकेको जस्तो देखिएको बताए । ‘बिद्यालयले आफैले पनि यसको ब्राण्डिङ गर्न सक्नुपर्छ,’ उनले भने ।
बर्दियाका पत्रकार निर्मल घिमिरे हलिउडका नायकले रोपेको बिरुवा हुर्केर ठुलो भईसक्दा पनि बिद्यालयले यसलाई पर्यटनसँग जोड्न नसकेको पाइएको बताउँछन् । ‘ठाकुरद्धारामा वर्षेनी ठुलो संख्यामा स्वदेशी र विदेशी पर्यटक आउँछन्, उनीहरुलाई बिद्यालयले यो रुख देखाउन सक्नुपथ्र्यो, बिद्यालयले यो रुखलाई पर्यटनसँग जोड्न सकेको देखिएन,’ उनले भने ।
