नेपालगन्ज : ‘एमटी एरिना प्रथम खजुरा गोल्डकप फुटबल प्रतियोगिता-२०८२’ को तयारी पूरा भएको आयोजकले जनाएको छ । प्रतियोगिताको तयारी पूरा भएको आइतबार खजुरा डिगाउँस्थित मिनी रंगशालामा आयोजित पत्रकार सम्मेलनमा जानकारी दिइएको हो । न्यू डाँफे स्पोर्टस् क्लबको आयोजना तथा खजुरा गाउँपालिकाको संरक्षकत्वमा सोमबारबाट प्रतियोगिता सुरु हुदैछ ।
पत्रकार सम्मेलनमा बोल्दै प्रतियोगिताका संयोजक एवम् न्यू डाँफे स्पोर्ट्स क्लबका अध्यक्ष बालाराम खत्रीले तयारी पुरा भएको
बताए । खजुरा गाउँपालिका वडा नम्बर ४ डिगाउँस्थित मिनी रंगशालामा सञ्चालन हुने प्रतियोगितामा कुल ८ वटा टिम सहभागी हुनेछन् । नक आउटका आधारमा खेलाइने उक्त प्रतियोगिता बैशाख ६ गतेसम्म चल्नेछ ।
प्रतियोगितामा गोर्खा ब्वाइज स्पोट्र्स क्लब बुटवल, संकटा स्पोट्र्स क्लब काठमाडौं, कांक्रेबिहार स्पोट्र्स क्लब सुर्खेत, फोर ब्रर्दश एफसी नवलपरासी, भारत लखनउको जेविएम फुटबल एकेडेमी, सशस्त्र प्रहरीको विभागिय टिम एपिएफ क्लब, नाईजेरियन जोन क्लब नाइजेरिया र आयोजक टिम न्यू डाँफे स्पोट्र्स क्लब सहभागी हुदैछन् । आयोजकका अनुसार प्रतियोगिताको पहिलो दिन गोर्खा ब्वाइज स्पोट्र्स क्लब बुटवल र संकटा स्पोट्र्स क्लब काठमाडौंबीच उद्घाटन खेल हुनेछ ।
प्रतियोगिताका विजेता टिमले नगद ७ लाखसहित ट्रफी, मेडल र प्रमाणपत्र तथा उप-विजेता टिमले नगद ४ लाखसहित ट्रफी, मेडल र प्रमाणपत्र गर्नेछन् । यस्तै विधागततर्फ उत्कृष्ठ खेलाडीलाई नगद सहित ट्रफी, मेडल र प्रमाणपत्र प्रदान गरिनेछ । प्रतियोगितामा प्रथम हुने टिमलाई प्रदान गरिने पुरस्कार राशीलाई अमेरिकामा रहेका खजुराबासी लिलबहादुर थापाले ब्यहोरेका छन् ।
प्रतियोगिताको उद्घाटन सोमबार दिउँसो ३ बजे मिनी रंगशालामा गरिनेछ । खजुरा गाउँपालिकाका अध्यक्ष एवम् प्रमुख अतिथी डम्बरबहादुर बिकले औपचारिक समारोहका बीच उद्घाटन गर्नेछन् । प्रतियोगिता उद्घाटन गर्नुअघि विभिन्न परम्परागत बाजागाजा सहित झाँकी निकालिने आयोजकले जनाएको छ ।
पत्रकार सम्मेलनमा खजुरा गाउँपालिका अध्यक्ष डम्बरबहादुर बिकले पहिलो पटक खजुरामा गोल्डकप आयोजना गर्ने युवाहरुको उत्साहलाई साकार पार्न स्थानीय सरकारले हातेमालो गरेको बताए । प्रतियोगितालाई आगामी वर्षको बजेटमा पनि निरन्तरता दिइने प्रतिबद्धता जनाए ।
उद्घाटन समारोह तथा प्रतियोगिता सञ्चालन अवधिभर ठुलो संख्यामा सर्बसाधारण, खेलप्रेमी दर्शकहरु लगायतको सहभागिता रहने आयोजकको अपेक्षा रहेको छ । प्रतियोगिता उद्घाटन समारोह तथा उद्घाटन खेललाई सर्बसाधारण तथा खेलप्रेमीले निःशुल्क रुपमा अवलोकन गर्न पाउने र अन्य दिनका खेल अवलोकनका लागि प्रतिब्यक्ती ५० रुपैयाँ प्रवेश शुल्क निर्धारण गरिएको आयोजकले जनाएको छ ।
