खजुरा : न्यू डाँफे स्पोर्ट्स क्लबको आयोजना तथा खजुरा गाँउपालिकाको संरक्षकत्वमा बाँकेको खजुरामा सम्पन्न प्रथम खजुरा गोल्डकप प्रतियोगिताको गाँउभेला गरेर हिसावकिताव सार्वजनिक गरिएको छ । मुख्य आयोजक रहेको न्यु डाँफे स्पोर्टस क्लवले आज गाँउभेला गरेर हिसावकिताव सार्वजनिक गरेको हो ।
गोल्डकप सम्पन्न गर्न सहयोग पुर्याउने स्थानीयबासी र दाताहरुको भेलामा अन्तरक्रिया सहित प्रतियोगिताको आम्दानी खर्च सार्वजनिक गरिएको छ । आर्थिक विवरण प्रस्तुत गर्नुअघि स्थानीयबासीलाई प्रतियोगिता र प्रतियोगिता सञ्चालनका क्रममा भएका कमीकमजोरी औंल्याउन आग्रह गरिएको थियो ।
भेलामा उपस्थित गाँउलेहरुले प्रतियोगिता सञ्चालनका क्रममा भएका कमीकजोरीहरु खुलेर औंल्याएका थिए । सहभागीहरुले उठाएको प्रश्न र जिज्ञासाहरुको जवाफ दिँदै क्लवका अध्यक्ष बालाराम खत्रीले पहिलो पटक गोल्डकप आयोजना गर्दा अन्जानमा कतिपय कमी भएको स्वीकार गर्दै आगामी प्रतियोगितामा सहभागीको सुझाव अनुसार कमीहरुलाई हटाउँदै जाने प्रतिबद्धता व्यक्त गरे ।
उनले सबैको सुझाव र आलोचनाबाट शिक्षा लिँदै अझै प्रभावकारी व्यवस्थापनमा दोस्रो गोल्डकप आयोजना गरिने बताए । प्रतियोगितामा कुल आम्दानी ५१ लाख ९६ हजार ०७१ आम्दानी भएको र ४८ लाख १९ हजार ३०४ रुपैयाँ खर्च भई ३ लाख ७६ हजार ७६७ रुपैयाँ बचत भएको अध्यक्ष खत्रीले सुनाए । आम्दानी मध्य १४ लाख ८३ हजार ५०० रुपैयाँ उठन बाँकी रहेको उनले बताए ।
बैशाख ६ गते सम्पन्न प्रतियोगितामा आयोजक न्यू डाँफे स्पोर्ट्स क्लबसहित जेविएम फुटबल एकेडेमी लखनउ, काँक्रेविहार क्लब सुर्खेत, फोर ब्रदर्श एफसी नवलपरासी, एपीएफ काठमाडौँ र नाइजेरियन जोन क्लब नाइजेरिया गरी ८ टोलीको सहभागिता रहेको थियो । प्रथम खजुरा गोल्डकप फुटबल प्रतियोगिताको उपाधि नाईजेरियन टोली जष्ट जोन एफसीले हात पारेको थियो ।
खजुरा गाँपालिका-४ डि गाउँस्थित मिनी रंगशालामा सम्पन्न खेलमा नाईजेरियन टोली जष्ट जोनले जेविएम क्लब लखनउ भारतलाई ४–० गोलले पराजित गर्दै गोल्डकप हात पारेको थियो । प्रतियोगिताको विजेतालाई ७ लाख रुपैयाँ र द्वितीयलाई ४ लाख रुपैयाँ नगद पुरस्कार प्रदान गरिएको थियो । प्रतियोगिताका विजेता टिमले विजेता पुरस्कार खजुराबासी हाल अमेरिका निवासी लिलबहादुर थापाको सौजन्यमा प्रदान गरेका थिए ।
