नेपालगन्ज : नेपाली कांग्रेसका पुराना नेता युवराज शर्मा राष्ट्रिय सभा सदस्यको उम्मेदवार बनेका छन् । कांग्रेस बाँकेका पुर्वसभापति समेत रहेका ७१ वर्षीय शर्मालाई पार्टीले आसन्न राष्ट्रिय सभा सदस्यका लागि लुम्बिनी प्रदेशबाट उम्मेदवार बनाएको हो ।
२०४५ देखी २०४९ सालसम्म उनी कांग्रेस बाँकेको सभापति भएर काम गरेका थिए । पार्टीमा योगदान धेरै भएपनि विगतदेखी हरेक अवसरबाट उनी बञ्चित हुँदै आएको उनका सहकर्मी बताउँछन् । पञ्चायत विरोधी गतिविधी गरेका कारण उनी २०२४ सालमा पहिलो पटक जेल परेका थिए । २०२४ सालपछि पटक-पटक गरेर आफु ३/४ वर्षजति जेल बसेको उनी सम्झिन्छन् ।
२०२५ सालमा विपी कोइरालासँग भारतको गोरखपुरमा उनको पहिलो पटक भेट भएको थियो । ‘विपीलाई भेट्न मसँगै डा. केशवराज शर्मा, अंगिरा सम्शेर, डा. अरुण कोइराला, सुरज श्रेष्ठसहित आठ जना गएका थियौं,’ विगतलाई सम्झिदै उनले भने ‘त्यहाँ विपीका विचार र निर्देशन सुनेर नेपालमा पार्टीका कामहरु भुमिगत भएर गथ्र्यौ ।’ विपी कोइरालासँग बाक्लो भेटघाट हुन थालेपछि आफु उनको विचारबाट धेरै प्रभावित भएको र कांगे्रेसको राजनीतिमा लागेको शर्माले सुनाए ।
उनी सुरुमा पढाईको शिलशिला भारतको बनारशमा गएका थिए । त्यहाँ विपी कोइरालाका विचार सुनेर प्रभावित भई नेपाल बिद्यार्थी संघ र कांगे्रेसको राजनीतिमा लागे । २०२७ सालमा भारतको बनारशबाट प्रतिनिधी भएर नेपाल बिद्यार्थी संघको काठमाडौं महाधिवेशनमा सहभागी भएका थिए । २०२८ सालमा शेरबहादुर देउवा नेपाल विद्यार्थी संघको केन्द्रिय अध्यक्ष हुँदा यिनै शर्मा उपाध्यक्ष भएर काम गरेका थिए । राजनीतिसँगै केहीवर्ष शिक्षण पेशामा समेत संलग्न रहेका उनी नेपाल शिक्षक संगठनको राष्ट्रिय महासचिव समेत भएका थिए ।
पार्टीको राजनीतिमा रहँदा उनको तत्कालिन नेता सुशिल कोइरालासँग सुरुमा राम्रै सम्बन्ध थियो । २०४८ सालपछि भने कोइरालासँग बैचारिक द्धन्द्ध सुरु भयो । कोइराला राजनीतिमा अगाडी बढ्दै गए । तर, शर्माले पार्टीको जिल्ला सभापति बाहेक अरु कुनैपनि पाएनन् । कोइराला र शर्माबीच द्धन्द्ध यसरी बढ्यो कि उनलाई हरेक अवसरबाट बञ्चित गराइयो । कोइरालाले शर्माको ठाउँमा अन्य नेतालाई अगाडी सारेर सांसद बनाए ।
शर्मालाई पार्टीले एक पटक पनि सांसदको टिकट दिएन । पार्टीले टिकट नदिएपछि उनी २०५१ सालमा क्षेत्र नम्बर १ र २ बाट स्वतन्त्र उम्मेदवार समेत बनेका थिए । कोइरालासँग उनी कहिल्यै झुकेनन् र कोइरालाले पनि उनलाई कहिल्यै अवसर दिएनन् ।
‘सुशिल जीसँग मेरो वैचारिक द्धन्द्ध भयो, उहाँसँग मेरो विवाद भएपछि गिरिजा बाबुले पनि मलाई रुचाउनु भएन, अनि हरेक अवसरबाट मलाई बञ्चित गराइयो,’ उनी सम्झन्छन् । नेपालगन्ज निवासी शर्माले बाँकेको क्षेत्र नम्बर ३ बाट पार्टीको राजनीति गर्दै आएका छन् । उनी कांग्रेसको १४ औं महाधिवेशनमा बाँकेको क्षेत्र नम्बर ३ बाट खसआर्य कोटामा महाधिवेशन प्रतिनिधी सर्वसम्मत निर्वाचित भएका थिए ।
‘ढिलै भएपनि पार्टीले मलाई मुल्यांकन गरेको छ, यसको लागि म सभापति शेरबहादुर देउवा जी लगायत केन्द्रिय कार्यसमितिका साथीहरुलाई धन्यवाद दिन्छु,’ उनले भने ‘राष्ट्रिय सभामा निर्वाचित भएपछि मैले संम्बैधानिक र पार्टीको दायित्व पुरा गर्नेछु ।’ आफुले संविधानले दिएको ब्यवस्था अनुसार पदीय दायित्व पुरा गर्ने नेता शर्मा बताउँछन् । पुराना नेता शर्मालाई अहिले पार्टीले राष्ट्रिय सभा सदस्यको उम्मेदवार बनाएर ठुलो न्याय गरेको यहाँका कांग्रेस नेता, कार्यकर्ता तथा उनका शुभेच्छुक बताउँछन् ।
‘पुराना नेतालाई पार्टीले अहिले ढिलै भएपनि सम्मान स्वरुप उम्मेदवार बनाएको सुन्न पाउँदा हामी धेरै खुसी छौं,’ नेपाली कांग्रेस बाँकेका पुर्वसभापति समेत रहेका शर्माका सहकर्मी सनत रेग्मीले भने ‘युवराज जीलाई मुल्यांकन भयो, हामीलाई पनि आशा पलाएको छ ।’ पार्टीले अहिले राष्ट्रिय सभा सदस्यको निर्वाचनमा अरु पनि राम्रा मान्छेलाई टिकट दिएको रेग्मी बताउँछन् ।
पुर्वमन्त्री एवम् कांग्रेस बाँकेका पुर्वसभापति गजेन्द्र हमाल वर्तमान पार्टी नेतृत्वले पुराना नेता युवराज शर्मालाई ठुलो न्याय गरेको बताउँछन् । 'उहाँलाई उम्मेदवार बनाउनुपर्छ भनेर मैले पनि केन्द्रिय नेताहरुलाई भनेको थिए, जीवनभर अन्यायमा परेको उहाँलाई वर्तमान पार्टी नेतृत्वले वास्तवमै न्याय गरेको छ, उहाँ चुनाव जित्नु हुन्छ,' हमालले भने ।
यो पनि पढ्नुस् :
कांग्रेसले राष्ट्रियसभा सदस्यका उम्मेदवार टुंग्यायो, लुम्बिनीबाट युवराज शर्मा
राष्ट्रिय सभा निर्वाचनमा बाँके कांग्रेसले गर्यो चार जनालाई सिफारिस
