पत्रकारले ढुक्कसँग खाए हात्ती पाइले रोग विरुद्धको औषधी

स्वास्थ्य

Home
स्वास्थ्य
पत्रकारले ढुक्कसँग खाए हात्ती पाइले रोग विरुद्धको औषधी

पत्रकारले ढुक्कसँग खाए हात्ती पाइले रोग विरुद्धको औषधी

हात्ती पाइले रोग विरुद्धको औषधी खादै नेपाल पत्रकार महासंघ बाँकेका अध्यक्ष दामोदर भण्डारी ।

नेपालगन्ज : हात्ती पाइले रोग विरुद्धको औषधी सेवनले स्वास्थ्यमा कुनै असर नगर्ने भएकाले ढुक्क भएर औषधी सेवन गर्न बाँकेका पत्रकारहरुले सबैलाई आब्हान गरेका छन् । नेपाल पत्रकार महासंघ बाँकेको कार्यालयमा शनिबार जिल्ला स्वास्थ्य कार्यालय बाँकेले आयोजना गरेको कार्यक्रममा बोल्ने पत्रकारका अगुवाले यस्तो आब्हान गरेका हुन् ।

कार्यक्रमलाई सम्बोधन गर्दै नेपाल पत्रकार महासंघ बाँकेका अध्यक्ष दामोदर भण्डारीले हात्ती पाइले रोगको संक्रमणबाट बच्न ढुक्क भएर औषधी सेवन गर्न आग्रह गरे । जिल्ला स्वास्थ्य कार्यालयले गत फागुन २८ गतेदेखि बाँकेमा हात्ती पाइले रोग विरुद्ध औषधी सेवन कार्यक्रम सञ्चालन गरिरहेको छ । तर, नेपालगन्ज उपमहानगरपालिकामा सबैभन्दा कम औषधी सेवन गरेको तथ्यांक आएको छ ।

हात्ती पाइले रोग विरुद्धको औषधी खादै नेपाल प्रेस युनियन बाँकेका अध्यक्ष अर्जुन ओली ।

सो क्रममा स्वास्थ्य कार्यालय बाँकेका प्रमुख धिरजंग शाहले नेपालगन्ज उपमहानगरपालिका क्षेत्रमा हात्ती पाइले रोग विरुद्धको औषधी कम मात्रामा सेवन गरेको बताए । हात्ती पाइले रोग विरुद्धको औषधी सेवनले मानव स्वास्थ्यमा कुनैपनि असर नगर्ने उनको भनाई थियो । कार्यालयका किटजन्य रोग नियन्त्रण फोकल पर्सन दुर्गा गौतमले अझैपनि हात्ती पाइले रोग विरुद्धको औषधी खान नमान्ने बताइन् ।

कार्यक्रममा नेपाल पत्रकार महासंघ लुम्बिनी प्रदेशका सदस्य मोहम्मद आरिफ अन्सारी, नेपाल प्रेस युनियन बाँकेका अध्यक्ष अर्जुन ओली, प्रेस चौतारी बाँकेका अध्यक्ष दुर्गा रोकाय र नेपालगन्ज उपमहानगरपालिका स्वास्थ्य शाखा प्रमुख रामबहादुर चन्दले मन्तब्य राखेका थिए । कार्यक्रममा उपस्थित भएका पत्रकारले हात्ती पाइले रोग विरुद्धको औषधी सेवनबारे समुदायमा ब्याप्त रहेको गलत बुझाईलाई चिर्न कलम चलाउने प्रतिवद्धता जनाए ।