नेपालगन्ज : टाईफाईड रोग विरुद्ध बाँकेसहित देशभर एकैसाथ खोप अभियान सञ्चालन गरिने भएको छ । यही चैत २३ गतेदेखी २८ गतेसम्म अभियान सञ्चालन गरिनेछ । उक्त खोप १५ महिनादेखी १५ वर्षसम्मका बालबालिकालाई दिइने जिल्ला स्वास्थ्य कार्यालय बाँकेका प्रमुख धिरजंग शाहले जानकारी दिए ।
जिल्ला खोप समन्वय समितिका पदाधिकारी र सञ्चारकर्मीसँग सोमबार गरिएको अभिमुखिकरणमा यस्तो जानकारी दिइएको हो । खोप अभियान सञ्चालन गर्न स्वास्थ्यकर्मी बिद्यालयमै पुग्ने भएका छन् । बिद्यालयमा ८० प्रतिशत र स्वास्थ्य संस्थामा २० प्रतिशत खोप केन्द्र सञ्चालन हुने स्वास्थ्य कार्यालयका नरेश श्रेष्ठले बताए ।
उनका अनुसार जिल्लाका १५ महिनादेखी १५ वर्ष सम्मका १ लाख ४८ हजार ९ सय ३३ जना बालबालिकालाई खोप लगाइनेछ । यसका लागि जिल्लाभर २ सय ६४ खोप केन्द्र राखिने भएको छ ।
कोभिड, हेपाटाइटिस लगायत अन्य खोप लगाएको १४ दिनपछि मात्र टाईफाईड रोग विरुद्धको खोप लगाउन मिल्ने श्रेष्ठले प्रष्ट्याए । ‘यो खोपले स्वास्थ्यमा कुनैपनि असर पुर्याउँदैन, विश्व स्वास्थ्य संगठनले नै प्रमाणित गरिसकेको खोप हो,’ उनले भने । तर, ज्वरो आएको र टाईफाईडको लक्षण देखिएको समयमा यो खोप लगाउन नमिल्ने श्रेष्ठले सुनाए ।
सो क्रममा वरिष्ठ बालरोग विशेषज्ञ डा. बिनोद खेतानले खोप बालबालिकाको लागि अनिवार्य भएको अवस्थामा टाईफाईड विरुद्धको खोप अभियान प्रभावकारी भएको बताए । ‘यो खोप अत्यन्तै राम्रो हो, यसले कुनैपनि साईड इफेक्ट गर्दैन,’ उनले भने । उक्त कार्यक्रम जिल्ला खोप समन्वय समितिका संयोजक समेत रहेका जिल्ला समन्वय समिति बाँकेका प्रमुख अजयकुमार श्रीवास्तवको सभापतित्वमा भएको थियो ।