कांग्रेसका जानकी गाउँपालिका सभापति यादवमाथी आक्रमण

समाज

Home
समाज
कांग्रेसका जानकी गाउँपालिका सभापति यादवमाथी आक्रमण

कांग्रेसका जानकी गाउँपालिका सभापति यादवमाथी आक्रमण

दूरसञ्‍चार शुक्रबार, साउन १३, २०७९

नेपालगन्ज : नेपाली कांग्रेस जानकी गाउँपालिका सभापति दयाराम यादवमाथी आक्रमण भएको छ । जानकी गाउँपालिकामा आयोजित कार्यक्रममा सहभागी भएर घर फर्किने क्रममा शुक्रबार बेलुका साढे ७ बजेतिर एक समुहले आक्रमण गरेको हो ।

पीडितका अनुसार जानकी गाउँपालिका वडा नम्बर ४ स्थित नहर छेउमा लुकेर बसेका स्थानीय नन्दराम लोनिया, राजाराम यादव, साजन बर्मा, राजकुमार बर्मा र जगतराम यादवले एक्कासी आक्रमण गरेका थिए । आक्रमणबाट यादवको शरिरको विभिन्न भागमा गहिरो चोट लागेको छ । उनको नेपालगन्ज मेडिकल कलेज शिक्षण अस्पताल नेपालगन्जमा उपचार भइरहेको छ ।

करिव एक हप्ता अघि सभापति यादव र स्थानीय जगतराम यादवबीच खेतमा पानी हाल्ने विषयमा सामान्य विवाद उत्पन्न भएको थियो । उक्त विवाद ईलाका प्रहरी कार्यालय खजुरा खुर्दसम्म पुगेको थियो । उक्त विवादका विषयमा प्रहरीले शुक्रबार मात्र दुबै पक्षबीच छलफल गराएर मिलाएको थियो । छलफल पश्चात उनीहरुले सभापति यादव घर फर्किन लागेका बेला एक्कासी मोटरसाईकल रोकेर आक्रमण गरेका हुन् ।

आफुलाई निर्घात रुपले कुटपिट गर्दै घटनाबारे कसैलाई जानकारी गराएमा ज्यान मार्ने धम्की समेत दिएको सभापति यादवले बताए । ‘कुटपिट गर्दा मेरो शरिरको कुनै भाग बाँकी राखेनन्,’ दूरसञ्चार डटकमसँग उनले भने ‘शरिरमा भित्री चोट बढी छ ।’

जिल्ला प्रहरी कार्याल बाँकेका प्रवक्ता(डिएसपी) मधुसुदन न्यौपानेले आक्रमणमा संलग्न ब्यक्तिको खोजी भइरहेको बताए । आक्रमणमा संलग्न ब्यक्तिको खोजी गरेपनि कतै फेला नपरेको उनले सुनाए । ‘घटना लगत्तै पुगेको प्रहरीले खोजी गर्दा कतै फेला परेनन्, सबैको पहिचान भइसकेकाले हामी पक्राउ गरेरै छाड्छौं ।’

प्रकाशित मिति: शुक्रबार, साउन १३, २०७९ २२:०२

प्रतिक्रिया दिनुहोस्