नरैनापुरलाई सुख्खा क्षेत्र घोषणा, विशेष राहत प्याकेज ल्याउन माग

समाज

Home
समाज
नरैनापुरलाई सुख्खा क्षेत्र घोषणा, विशेष राहत प्याकेज ल्याउन माग

नरैनापुरलाई सुख्खा क्षेत्र घोषणा, विशेष राहत प्याकेज ल्याउन माग

बाँके (नरैनापुर) : बाँकेको नरैनापुर गाँउपालिकाको कार्यपालिका बैठकले नरैनापुरलाई सुख्खा क्षेत्र घोषणा गरेको छ । प्रर्याप्त सिंचाइ व्यवस्था नभएकोले यहाँका किसान आकाशे पानीको भरमा खेती गर्न बाध्य छन् । पानी नपरेकाले धान रोपाई हुन नसक्दा बैकल्पिक उपाय अपनाएर लगाएको धानबाली समेत नष्ट भईसकेको हेको गाउँपालिका अध्यक्ष ईस्तियाक अहमद शाहले बताएका छन् ।

बढ्दो गर्मीसंगै उक्त क्षेत्रमा पानी नपरेपछि खेतीयोग्य जमिन बाँझो रहेको र पानीको स्रोतहरु सुक्न थालेपछि नरैनापुरमा पानीको हाहाकार हुँदा गाउँपालिकालाई सुख्खाग्रस्त क्षेत्र घोषणा गरिएको प्रमुख प्रशासकीय अधिकृत भरत बस्नेतले बताए । गाँउपालिका अध्यक्ष शाहको अध्यक्षतामा बिहीबार बसेको आकस्मिक बैठकले यस्तो निर्णय गरेको उनले बताए ।

किसानहरुका लागि सिंचाईका लागि व्यापक डिप बोरिङ लयायत अन्य बैकल्पिक व्यवस्था गर्न, सिंचाईको लागि किसानलाई सहुलियत स्वरुप डिजलको व्यवस्था गर्न, किसानहरुको सुविधाको लागि कृषि बिद्युतीकरणको व्यवस्था गर्न र कृषि मिटर उपलब्ध गराई विद्युत महसुल निःशुल्क गर्न बैठकमा कुरा उठेको नरैनापुर ४ का वडाअध्यक्ष मनोज शर्माले बताए । प्रसस्त पानी नपरेका कारण धान रोपाई हुन नसकेको उनले बताए ।

सुख्खा क्षेत्र घोषणा भईसकेकोले किसानहरुका लागि विशेष राहतको प्याकेज ल्याउन प्रदेश र संघीय सरकारसँग गाउँपालिकाले आग्रह गरेको छ । खडेरीले गर्दा कृषिमा आश्रित बहुसंख्यक जनताको जीवन कष्टकर बन्दै गएको अवस्थाप्रति प्रदेश र संघीय सरकारको ध्यान पुग्न जरुरी रहेको अध्यक्ष शाहको भनाई छ । यस्तै बैठकले मालपोतमा ८० प्रतिशत कर छुट दिने निर्णय गरेको प्रशासकीय अधिकृत बस्नेतले जानकारी दिए ।

प्रकाशित मिति: बिहीबार, साउन २६, २०७९ २२:५२

प्रतिक्रिया दिनुहोस्