नेपालगन्ज : नेपाली कांग्रेस बाँकेका जिल्ला सदस्य अमृतकुमार आचार्यलाई यतिबेला आसन्न प्रदेश सभा निर्वाचनले छोएको छ । अचेल दैनिक रुपमा उनको भेटघाट बाक्लिएको छ । झ्वाट्ट हेर्दा सामान्य ब्यक्ति जस्तै लाग्ने आचार्य दृष्टिबिहिन हुन् । तर, उनको सक्रियता पार्टीभित्र साधारण नेता कार्यकर्ताको भन्दा कम छैन ।
शारिरीक रुपमा अशक्त भएपनि जिल्ला सदस्यको जिम्मेवारी पाएपछि पार्टीको काममा झनै सक्रिय भएका छन्, उनी । नेपालगन्ज उपमहानगरपालिका वडा नम्बर १२ निवासी आचार्य वडा तहदेखी जिल्ला तहसम्म पार्टीका हरेक गतिविधीमा सामेल हुन्छन् ।
उनको योगदान यत्तिमा मात्र सिमित छैन, गत बैशाखमा सम्पन्न स्थानीय तहको निर्वाचनमा नेपालगन्ज उपमहानगरपालिका वडा नम्बर १२ मा कांग्रेसका उम्मेदवारलाई जिताउन पनि अग्रणी भुमिका खेलेका थिए । उक्त वडामा कांग्रेसकै बिद्रोही उम्मेदवार उठेका बेला आधिकारिक उम्मेदवारलाई जिताउन उनलाई ठुलै चुनौती थियो ।
उनी राम्ररी देख्न सक्दैनन, तर दिउँसोको समयमा आचार्य आफै हिडडुल गर्न सक्छन् । रात परेपछि भने उनलाई हिड्न समस्या हुन्छ । आगामी मंसिर ४ गते हुन लागेको प्रदेश सभा निर्वाचनका लागि जिल्ला सदस्य आचार्य समानुपातिकतर्फ उम्मेदवारका रुपमा सिफारिसमा परेका छन् ।
प्रदेशसभा-२ ‘ख’ बाँकेले केहीदिन अघि उनीसहित नेताहरुको नाम सिफारिस गरेको थियो । आसन्न निर्वाचनमा पार्टीले अपांगता कोटाबाट आफुलाई प्रदेश सांसदको बन्द सूचीमा राख्ने उनको अपेक्षा छ । शारिरीक अशक्तताले गर्दा उनी चाहेर पनि प्रत्यक्षतर्फ चुनाव लड्न सक्दैनन् ।
त्यसकारण उनलाई एउटै आशा छ, पार्टीले समानुपातिकतर्फ सांसदको बन्द सूचीमा नाम राखेर देशकै उदाहरण प्रस्तुत गर्नेछ । यदी पार्टीले समानुपातिक सांसदको रुपमा आचार्यको नाम बन्द सूचीमा राख्यो भने सम्भवतः उनी लुम्बिनी प्रदेशको पहिलो दृष्टिविहिन प्रदेश सांसद बन्न पाउनेछन् । आचार्यलाई कांग्रेसले सांसद बनाउँदा अन्य दलका लागि पनि सिकाई हुनेछ ।
यतिबेला पार्टीका अधिकांस नेताहरु टिकटका लागि काठमाडौं पुगेर नेताका घर, दैलो चहारिरहेका छन् । तर, आचार्यले अहिलेसम्म कुनैपनि नेतालाई त्यसरी भेटेका छैनन् । उनले चाहेर पनि भेट्न सकेका छैनन् । केही नेतासँग फोनमा बाहेक प्रत्यक्ष कुराकानी गरेका छैनन् । नेपाल बिद्यार्थी संघ हुँदै नेपाली कांग्रेसमा उनको योगदान धेरै छ । उनी शहिदका छोरा पनि हुन् । यसले गर्दा पनि उनी प्रदेश सांसदका लागि थप योग्य मानिन्छन् । सबैसँग सहजै घुलमिल हुने र सबैलाई समान ब्यवहार गर्ने उनको स्वभाव छ ।
त्यसकारण उनी सबैका नजरमा प्रिय छन् । २०६२ सालमा नेपाल बिद्यार्थी संघ महेन्द्र बहुमुखी क्याम्पस दाङको ईकाई सभापति समेत भइसकेका आचार्य राजनीतिसँगै पढाईमा पनि उत्तिकै तेजिला छन । उनले अंग्रेजी विषयमा स्नातकोत्तर पुरा गरेका छन् ।
दाङको भमके निवासी उनका बुवा अनन्तकुमार आचार्यलाई तत्कालिन सशस्त्र द्धन्द्धका क्रममा नेकपा माओवादीले हत्या गरेको थियो । बुवाको हत्यापछि उनको परिवार त्यहाँबाट विस्थापित भएर नेपालगन्ज आएको हो । बुवाको सपना पुरा गर्नका लागि राजनीतिमा होमिएका उनी पार्टीको १४ औं महाधिवेशनबाट जिल्ला कार्यसमिति बाँकेमा निर्विरोध सदस्य पदमा निर्वाचित भएका थिए ।
‘नेपाली कांग्रेस भएकै कारण बुवाको हत्या भयो, बुवाको सपना पुरा गर्नकै लागि भएपनि म राजनीतिमा लागेको हुँ,’ उनले भने ‘मलाई यसपटक पार्टीले लुम्बिनी प्रदेशको समानुपातिक सांसद बनाउने विश्वास छ, पार्टीले म जस्ता अपांगता र दृष्टिबिहिनलाई संसदसम्म पुर्याएर गतिलो उदाहरण प्रस्तुत गर्नेछ ।’
समग्र अपांगता भएका ब्यक्ति तथा दृष्टिविहिनका लागि आवश्यक नीति निर्माण कार्यमा प्रतिनिधित्व गर्न र कांग्रेसको पक्षमा संसदमा आवाज बुलन्द गर्न सांसद बन्ने आकांक्षा राखेको आचार्य बताउँछन् ।
यो पनि पढ्नुस् :
बाँकेको प्रदेश सभा-२ ‘ख’ मा वन मन्त्री हमालसहित कांग्रेसका ७ जना सिफारिस
'लोकप्रिय' युवा नेता आचार्य कांग्रेस जिल्ला सदस्यमा निर्विरोध-(भिडियो अन्तरवार्ता)
कांग्रेस बाँकेको निर्वाचन नजिकिदै गर्दा अमृतकुमारको सक्रियता
शहिदका ‘दृष्टिबिहिन’ छोरा अमृतकुमार होमिदैं कांग्रेस निर्वाचनमा
