काठमाडौं : निर्वाचन आयोगले आगामी मंसिर ४ गते हुने प्रतिनिधिसभा निर्वाचनमा समानुपातिकतर्फका लागि बिहीबार आजदेखि अस्थायी मतदाता नामावली संकलन गर्ने भएको छ । आयोग प्रवक्ता शालिग्राम शर्मा पौडेलले प्रतिनिधिसभा निर्वाचनमा समानुपातिक निर्वाचनका लागि आवश्यक पर्ने अस्थायी मतदाता नामावली संकलन तथा अद्यावधिक गर्ने कार्य सुरु गर्न लागिएको जानकारी दिए ।
‘आगामी मंसिर ४ गते हुने प्रतिनिधिसभा निर्वाचनअन्तर्गत समानुपातिक निर्वाचनका लागि आवश्यक पर्ने अस्थायी मतदाता नामावली संकलन तथा अद्यावधिक गर्ने काम आजदेखि सुरु गरिँदैछ,’ उनले भने । अस्थायी मतदाता नामावलीमा नाम समावेश हुन आयोगबाट स्वीकृत अन्तिम मतदाता नामावलीमा नाम समावेश भएको हुनुपर्ने छ ।
यस्ता मतदाताले प्रदेश सभातर्फ समानुपातिक निर्वाचनमा मतदान गर्न नपाउने उनले बताए । अस्थायी मतदाता नामावलीमा समावेश गरिएका मतदाताले प्रतिनिधिसभातर्फ समानुपातिक निर्वाचनमा मात्र मतदान गर्न पाउने व्यवस्था छ ।
सर्वोच्च अदालतले मतदाता नामावली ऐन, २०७३ अनुसार अस्थायी मतदाता नामावली तयार गरी मताधिकार प्रयोग गर्न पाउने आवश्यक व्यवस्था मिलाउन आयोगलाई विभिन्न समयमा आदेश दिएको थियो ।
उक्त ऐनमा सरकारी कर्मचारी, ब्यारेकमा रहेका नेपाली सेना, नेपाल प्रहरी, सशस्त्र प्रहरी, कारागारमा रहेका थुनुवा/कैदी, निर्वाचन कार्यमा खटिएका कर्मचारी र सुरक्षाकर्मी सरकारबाट स्वीकृत लिई सञ्चालन भएको वृद्धाश्रममा बसेका व्यक्तिको अस्थायी मतदाता नामावली संकलन गरी मतदान गर्न पाउने व्यवस्था छ ।
