नेपालगन्ज : आगामी आइतबार हुन लागेको प्रतिनिधी सभा र प्रदेश सभा निर्वाचनका लागि मतदान केन्द्रको सबैभन्दा अग्रस्थानको सुरक्षा कमाण्ड नेपाल प्रहरी(जनपद) ले सम्हाल्ने भएको छ । प्रहरीकै कमाण्डमा म्यादी प्रहरी पनि मतदान केन्द्रभित्र खटिनेछन् । तर, मतदान केन्द्रभित्र मतपेटिकाको सुरक्षा हतियार सहित रहने नेपाल प्रहरीले गर्नेछ ।
बाँकेका प्रमुख जिल्ला अधिकारी सुर्यबहादुर खत्रीका अनुसार निर्वाचनका लागि जिल्लाका तीन वटै क्षेत्रमा कुल ४ हजार ५ सय भन्दा बढी सुरक्षाकर्मी परिचालित हुनेछन् । ‘निर्वाचन सुरक्षाका लागि नेपाल प्रहरी, म्यादी प्रहरी, सशस्त्र प्रहरी, नेपाली सेना र राष्ट्रिय अनुसन्धानका कर्मचारीहरु संयुक्त रुपमा सुरक्षामा खटिनेछन्,’ उनले भने । मतदान केन्द्रको सबैभन्दा अग्रस्थानमा नेपाल प्रहरीसँगै म्यादी प्रहरी, त्यसपछि सशस्त्र प्रहरी र सबैभन्दा बाहिरी भागमा नेपाली सेना खटिने प्रजिअ खत्रीले सुनाए ।
निर्वाचनका लागि नेपाल प्रहरी (जनपद) र म्यादी प्रहरी गरी ३ हजार १ सय ५० जना जनशक्तीलाई खटाइएको जिल्ला प्रहरी कार्यालय बाँकेका प्रमुख(एसपी) श्यामकृष्ण अधिकारीले बताए । ‘मतदान केन्द्रभित्र नेपाल प्रहरी र म्यादी प्रहरी खटिनेछन्, त्यस बाहिर सशस्त्र प्रहरी परिचालित हुन्छन्, त्यो भन्दा पनि बाहिर नेपाली सेनाको टोली आवश्यकता अनुसार खटिनेछ,’ उनले भने ।
जिल्लाका सबै मतदान केन्द्रमा सुरक्षाकर्मीको टोली पुगिसकेको उनले जानकारी दिए । मतदान केन्द्र बाहेक नेपाल प्रहरीको १७ वटा मोबाईल टोली जिल्लाभर परिचालित हुने एसपी अधिकारीले बताए । ‘सशस्त्र प्रहरीको पनि छुट्टै मोबाईल टोली खटिन्छ, नेपाली सेना पनि ठाउँ ठाउँमा गस्तीका लागि निस्कन्छ,’ जिल्ला सुरक्षा समितिका सदस्य समेत रहेका एसपी अधिकारीले भने ।
उनका अनुसार सशस्त्र प्रहरीले आफ्नो ६ सय ५० जना जनशक्ती खटाउँदैछ । नेपाली सेनाले भने आवश्यकता अनुसार जनशक्ती खटाउनेछ । जिल्लाभरको निर्वाचन सुरक्षाको कमाण्ड बाँकेका प्रमुख जिल्ला अधिकारी खत्रीले सम्हालेका छन् ।
बाँकेका ३ वटा निर्वाचन क्षेत्रमा १ सय ३८ वटा मतदान स्थल राखिएको छ । सोही मतदान स्थलमा ३ सय ८० वटा मतदान केन्द्र राखिएको हो । क्षेत्र नम्बर १ मा १ सय ३७, क्षेत्र नम्बर २ मा १ सय १३ र क्षेत्र नम्बर ३ मा १ सय ३० वटा मतदान केन्द्र राखिएको छ । सबै केन्द्रमा निर्वाचन कर्मचारीसहित सुरक्षाकर्मीलाई पनि खटाइएको जिल्ला प्रशासन कार्यालय बाँकेले जनाएको छ ।
