निर्वाचनमा १९ जना बहालवाला मन्त्री पराजित

राजनीति

Home
राजनीति
निर्वाचनमा १९ जना बहालवाला मन्त्री पराजित

निर्वाचनमा १९ जना बहालवाला मन्त्री पराजित

दूरसञ्‍चार शनिबार, मंसिर १०, २०७९

काठमाडौं : मंसिर ४ गते सम्पन्न आम निर्वाचनमा १९ जना बहालवाला मन्त्री पराजित भएका छन् । प्रतिनिधिसभा र प्रदेशसभा सदस्य निर्वाचनमा प्रत्यक्षतर्फ उम्मेदवार रहेका संघीय र सातवटा प्रदेश सरकारका गरी १९ जना मन्त्री पराजित भएका हुन् ।

उम्मेदवार बनेका केही मन्त्रीको अझै नतिजा आएको छैन । संघीय सरकारका ५ जना बहालवाला मन्त्री पराजित भएका छन् । जसमा संस्कृति, पर्यटन तथा नागरिक उड्ययनमन्त्री जीवनराम श्रेष्ठ, ऊर्जा, जलस्रोत तथा सिँचाइमन्त्री पम्फा भुसाल, युवा तथा खेलकुदमन्त्री महेश्वरजंग गहतराज, खानेपानी तथा सरसफाइमन्त्री उमाकान्त चौधरी र राज्यमन्त्री उमेश श्रेष्ठ छन् ।

सत्ता गठबन्धनको सहयोगमा नेकपा एकीकृत समाजवादी बाट उम्मेदवार बनेका पर्यटनमन्त्री श्रेष्ठ काठमाडौं ८ मा पराजित भए । उनी रवि लामिछाने नेतृत्वको राष्ट्रिय स्वतन्त्र पार्टी (रास्वपा) का विराजभक्त श्रेष्ठसँग पराजित भएका हुन् ।

यस्तै सत्ता गठबन्धनकै सहयोगमा नेकपा माओवादी केन्द्रबाट ललितपुर ३ मा उम्मेदवार रहेकी ऊर्जामन्त्री भुसाल रास्वपाकी डा. तोसिमा कार्कीसँग पराजित भइन् । भुसाल तेस्रो स्थानमा सीमित भइन् । बाँके १ बाट प्रतिनिधिसभामा माओवादी केन्द्रबाट उम्मेदवार रहेका खेलकुदमन्त्री गहतराजलाई एमालेका सूर्य ढकालले पराजित गरे ।

खानेपानीमन्त्री चौधरी बारा १ मा नेकपा एमालेका अच्युतप्रसाद मैनालीसँग पराजित भए । कांग्रेसबाटै चितवन २ मा उम्मेदवार रहेका राज्यमन्त्री श्रेष्ठ रास्वपाका सभापति रवि लामिछानेसँग फराकिलो मतान्तरले पराजित भए । संघ सरकारकै सूचना तथा सञ्चारमन्त्री ज्ञानेन्द्रबहादुर कार्की र गृहमन्त्री बालकृष्ण खाण शुक्रबार साँझसम्म पछाडि परेका छन् । -नागरिक दैनिकबाट साभार

प्रकाशित मिति: शनिबार, मंसिर १०, २०७९ ०८:५१

प्रतिक्रिया दिनुहोस्