नेपालगन्ज : अपांगता भएका ब्यक्तिहरुको छाता संगठन राष्ट्रिय अपांग महासंघ नेपालको नेपालगन्जमा सुरु भएको २१ औं वार्षिक साधारण सभा तथा नवौं महाधिवेशनमा नयाँ नेतृत्व ल्याउने कसरत सुरु भएको छ । नयाँ नेतृत्व चयन प्रक्रिया सुरु हुँदा यसपटक बढी चर्चामा छन् गणेशबहादुर खत्री ।
तीन वर्षअघि बिराटनगरमा सम्पन्न ८ औं महाधिवेशनमा नेतृत्वको आकांक्षा राखेर उम्मेदवार भएपनि उनी पराजित भएका थिए । नेपालगन्जमा यसपटक भएको महाधिवेशनमा भने खत्रीको पक्षमा महोल देखिएको सहभागीहरु बताउँछन् । अघिल्लो निर्वाचनमा पराजित भएका कारण पनि यसपटक उनले केही सहानुभुती मत प्राप्त गर्ने आँकलन गरिएको छ ।
‘तीन वर्ष अगाडी उहाँ (गणेशबहादुर खत्री) महासंघको नेतृत्वमा आउन खोज्नु भएको हो, त्यतिबेला उहाँले चुनाव हार्नु भयो, चुनाव हारेपनि तीन वर्षसम्म हरेक अपांगता ब्यक्ति र संस्थाको हक अधिकारका लागि निरन्तर काम गर्नुभयो, यसले गर्दा अहिले अधिकांस महाधिवेशन प्रतिनिधिको एउटै स्वर छ, महासंघको नयाँ नेतृत्वमा गणेशबहादुर खत्रीलाई नै ल्याउनुपर्छ,’ एक जना प्रतिनिधिले भने ।
उक्त महाधिवेशनमा विभिन्न १० प्रकारका अपांगता सम्बन्धी गैरसरकारी संस्थाबाट एक जना महिलासहित २ जनाका दरले कुल ७ सय ८७ जना महाधिवेशन प्रतिनिधि सहभाागी भएको बताइएको छ । नयाँ नेतृत्वका लागि खत्रीसहित अन्य चार जना पनि अहिलेसम्म आकांक्षी देखिएका छन् ।
राष्ट्रिय अपांग महासंघकी निर्वतमान केन्द्रिय उपाध्यक्ष रमा ढकाल, केन्द्रिय कोषाध्यक्ष केपी अधिकारी, लुम्बिनी प्रदेशका निवर्तमान अध्यक्ष देवीदत्त आचार्य र अनुशासन आयोगका निर्वतमान अध्यक्ष टेकनाथ न्यौपानेले पनि आकांक्षा राखेका हुन् ।
‘नेतृत्वमा आउन खोज्नु स्वभाविक कुरा हो, तर देशभरका अपांगता भएका साथीहरुको हकहितका साथै उहाँहरुका समस्याका विषयमा बोलिदिने, वकालत र पैरवी गर्ने काम कस्ले गर्न सक्छ र कस्लाई जिताइयो भने महासंघलाई हाँक्न सक्छ भन्ने कुराको सोच विचार गरेर मुल्यांकन गर्न जरुरी छ,’ उनले भने । देशभरका कुल ७ वटा प्रदेश मध्ये ५ वटा प्रदेशका अधिकांस महाधिवेशन प्रतिनिधि आफ्नो पक्षमा रहेकाले जित्ने अर्को बलियो आधार रहेको उम्मेदवार खत्रीले सुनाए ।
अघिल्लो महाधिवेशनमा आफुले चुनाव हारेपनि आफु विगतमा तीन वर्षसम्म निरन्तर सक्रिय भएर काम गरेको खत्रीले बताए । ‘अपांगता भएका ब्यक्तिका लागि स्वाभलम्वन जीवन पद्धति केन्द्र काठमाडौं’ नामक गैरसरकारी संस्थाको उनी महासचिव हुन् ।
महाधिवेशनमा बुधबार (भोली) मतदान गराउने गरी निर्वाचन प्रक्रिया अगाडी बढाइएको निर्वाचन समितिका अधिवक्ता सुनिता शर्मा(ज्ञवाली) ले जानकारी दिइन् । नेपालगन्ज उपमहानगरपालिकाको भवानियापुरस्थित मेरो प्लानेटमा उक्त महाधिवेशन राखिएको छ ।
भिडियो हेर्नुस् :
