नेपालगन्ज : बाढीले राप्ती नदीको तटबन्ध भत्काएको लामो समय भईसक्दा पनि मर्मतको काम सुरु नभएपछि लुम्बिनी प्रदेशका निर्वतमान मन्त्री एवम् सांसद कृष्णा केसी 'नमुना' ले पहल थालेकी छन् । राप्ती सोनारी ७ फत्तेपुर र नरैनापुर ६ मा गतवर्ष भत्केको राप्तीको तटबन्ध मर्मत नहुँदा स्थानीय बासिन्दा त्रसित भएका छन् ।
तटबन्ध तत्काल मर्मत नगर्ने हो भने ठुलो क्षति ब्यहोर्नुपर्ने निश्चित रहेको स्थानीय जनप्रतिनिधिले समेत बताइरहेका छन् । बाढी प्रभावित क्षेत्रका स्थानीयले बर्खा अगाडी तटबन्ध मर्मत गरिदिन आग्रह गरिरहेका बेला बाँके प्रदेश सभा-१ ‘क’ बाट निर्वाचित सांसद समेत रहेकी नमुनाले बर्खा अगाडी नै तटबन्ध मर्मत गराउन आफुले विभिन्न निकायमा दबाव दिइरहेको बताइन् ।
राप्ती सोनारी र नरैनापुरमा राप्ती नदीको बाढीले पुर्याएको क्षतिलाई नजिकबाट हेरेकी उनले तटबन्ध मर्मतको काम अगाडी बढाउन संघिय सरकारका विभिन्न मन्त्रालयमा पुगेर बजेट मागेकी छन् । हालै प्रधानमन्त्री पुष्पकमल दाहालसहित जलस्रोत तथा सिचाइँ, भौतिक पुर्वाधार र गृह मन्त्रालयका मन्त्री एवम् सचिवलाई भेटेर आवश्यक बजेट ब्यवस्थापन गर्न माग गरेको सांसद केसीले बताइन् ।
‘राप्तीले क्षति गरेको ९ स्थानको तटबन्धमा तत्काल मर्मत गर्ने कुरा भएको छ,’ सांसद नमुनाले दूरसञ्चार डटकमसँग टेलिफोनमा भनिन् ‘अति जोखिमपूर्ण ठाउँमा तटबन्ध मर्मतका लागि सम्माननीय प्रधानमन्त्री ज्यु लगायत मन्त्री र सचिवसँग भेटघाट गरेर बजेट माग्ने काम गरेको छु, मलाई विश्वास छ, अबको दुई महिनाभित्रमा भत्केको तटबन्ध मर्मत हुन्छ ।’
राप्ती नदीको विभिन्न ठाउँमा निर्माण गरिएको तटबन्धमा २०७९ असोज महिनामा आएको बाढीले क्षति पुर्याएको थियो । स्थानीय जनप्रतिनिधिका अनुसार राप्ती सोनारी ७ मा मात्रै करिव ११ सय मिटर लामो तटबन्ध मर्मत गर्नु पर्ने देखिएको छ । यस्तै नरैनापुर गाउँपालिका वडा नम्बर ६ मा करिव डेढ सय मिटर क्षेत्र तटबन्ध मर्मत गर्नुपर्नेछ ।
सम्बन्धित समाचार पढ्नुस् :
राप्तीपारीका जनप्रतिनिधि भन्छन्, 'तटबन्ध तत्काल मर्मत नगर्ने हो भने क्षति ब्यहोर्नुपर्ने निश्चित छ’
बर्खा नजिक आउँदा फत्तेपुर गाउँमा बाढीको डर
