बाँके (गाभर) : जिल्लाको राप्ती सोनारी गाउँपालिका वडा नम्बर १ गाभरस्थित जंगलमा पाटेबाघको घेरामा परेर पनि बाँच्न सफल भएका तिनै जनाले पुर्नजन्म पाएको बताएका छन् । स्थानीय अन्दाजी ५६ बर्षका सेतु ओली, २३ बर्षीया कालिका खड्का र २५ बर्षकी हिरा खड्काको शनिबार दिउँसो सकुशल उद्दार गरिएको थियो ।
नजिकैको सामुदायिक वन क्षेत्रमा भैंसी र बाख्रा चराउन गएका उनीहरुलाई गाभर र सिक्टा गाउँको बीचमा पर्ने राजमार्गभन्दा करिव एक किलोमिटर दक्षिण जंगल (खर्चेताल जाने बाटो) मा पाटेबाघले फेला पारेर घेरा हालेका थिए । बाघबाट जोगिन रुखमा चढेका उनीहरुलाई करिव डेढ घण्टापछि निकुञ्जका हात्तीको सहायताले उद्दार गरिएको थियो । उनीहरुका अनुसार मध्यान्ह १२ बजेतिर रुखमा चढेकोमा डेढ घण्टापछि मात्र उद्दार भएको थियो ।
त्यहाँ चार वटा पाटेबाघ रहेको उनीहरुले बताएका छन् । तर, निकुञ्ज प्रशासनले त्यहाँ एउटा मात्र बाघ रहेको दाबी गरेको छ । ‘बाघ चार वटा नै छन्, हाम्रै आँखाले देखेका हौं,’ हिरा खड्काले भनिन् । रुखमा चढेका मान्छेलाई झम्टिन नसकेपछि बाघले बाख्रा र भैसीलाई लखेट्दै तितर-वितर पारेको उनीहरुले बताएका छन् । बाघले लखेटेर ५ वटा भैसीलाई राप्ती नदीपारी खर्चेसम्म पुर्याएको र बाख्रालाई सकुशल छाडेको बताए । बाघबाट जोगिएर आफुहरुले पुर्नजन्म पाएको उनीहरुको भनाइ छ । ‘बाघबाट जोगिएर पुर्नजन्म पायौं, अहिले पनि मुटु काँपिरहेको छ, डर लागिरहेको छ,’ कालिका खड्काले भनिन्
निकुञ्जका प्रमुख संरक्षण अधिकृत श्यामकुमार शाहले गाभरका तीनै जनालाई निकुञ्जको हात्तीले उद्दार गर्न सफल भएको बताए । उनले निकुञ्जले सूचना पाउने वित्तिकै त्यस क्षेत्रमा नेपाली सेनासहित निकुञ्जका थप कर्मचारी परिचालन भएको जानकारी दिए । ‘समयमै हात्तीको मद्दतले उहाँहरुको उद्दार भएका कारण ठुलो घटना हुन पाएन, उहाँहरु सकुशल घर फर्किनु भयो,’ उनले भने ।
हिरा खड्का
राप्ती सोनारी-१ गाभर, बाँके
जंगलमा भैसी र बाख्रा आफ्नै सुरमा चरिरहेका थिए । एक्कासी भैसी र बाख्रा जल्किए । हामीले के भयो भनेर हेर्दा ठुला–ठुला(वयस्क) पाटेबाघ पो रहेछन् । चार वटा पाटेबाघहरु सिधैं हामीतिर आईहाले । अब नबाँचिने भइयो भनेर हामी छिटो–छिटो रुखमा चढ्यौं ।
रुखमा चढ्दा–चढ्दै मेरो अमाजु दाई (सेतु ओली) लाई धन्न बाघले झम्टिसकेको थियो । उहाँ थोरै माथी चढिसक्नु भएको हुँदा बाघले भेटाउन पाएनन् । जेठानी दिदी (कालिका खड्का) र अमाजु दाई (सेतु ओली) को भन्दा म अलि ठुलो रुखमा चढेकी थिएँ । हामीहरु रुखमा बसेर कराउन, चिच्याउन थाल्यौं, बाघले हामीलाई घेरा हालेर तलतिर उभिरहे । बाघले घरी हामीतिर हेर्छन्, घरी बाख्रा र भैसीलाई लखेट्छन् ।
त्यसैक्रममा हाम्रो आवाज कसैले सुनेछन् । हाम्रो आवाज सुनेर नजिकै रहेका हात्ती र निकुञ्जका कर्मचारी आए । हात्ती आएपछि बाघले त्यो ठाउँ छाडे । तर, हात्तीसँग पनि बाघहरु नडराउँदा रहेछन् । हात्तीले लखेटेपछि बल्ल-तल्ल बाघहरु त्यहाँबाट भागे ।
हात्तीसहित निकुञ्जका कर्मचारी आएपछि बाँच्ने आशा पलायो, नत्र हामी बाँचौला भन्ने कल्पना नै गरेका थिएनौं । रुखमा चढेको बेलामा घर परिवारको मात्र याद आईरह्यो । घर परिवारलाई सम्झेर रोईरह्यौं । घरमा रहेका ९ वर्षकी छोरी, ५ वर्षको छोरा, श्रीमान र बुढी सासुआमालाई सम्झिएर रोईरहे । ( दूरसञ्चार डटकमसँग गरिएको कुराकानीमा आधारित )
यो पनि पढ्नुस् :
बाघबाट जोगिन रुखमा चढेका तीन जनाको सकुशल उद्वार
