कोहलपुर नगरपालिकालाई पूर्ण खोप सुनिश्चितता घोषणा

स्वास्थ्य

Home
स्वास्थ्य
कोहलपुर नगरपालिकालाई पूर्ण खोप सुनिश्चितता घोषणा

कोहलपुर नगरपालिकालाई पूर्ण खोप सुनिश्चितता घोषणा

कोहलपुर : कोहलपुर नगरपालिकालाई शुक्रबार पूर्ण खोप सुनिश्चितता तथा दिगोपना घोषणा गरिएको छ । जिल्ला खोप समन्वय समितिका सह-संयोजक समेत रहेकी जिल्ला समन्वय समितिका उपप्रमुख सीता कार्कीले कोहलपुरलाई पूर्ण खोप सुनिश्चितता तथा दिगोपना घोषणा गरिन् ।

कोहलपुर नगरपालिकाका एक वर्ष मुनिका १ हजार ७७६ जना बालबालिकालाई खोप लगाउने लक्ष्य राखिएको थियो । त्यसमा बीचमा ११ जना खोप लगाउन छुटेका थिए । छुटेकालाई पनि खोप लगाइएपछि पालिकालाई पूर्ण खोप सुनिश्चितता तथा दिगोपना घोषणा गरिएको नगरपालिकाका स्वास्थ्य शाखा प्रमुख अनिलसेन ठकुरीले जानकारी दिए ।

घोषणा सभा नगरपालिका खोप समन्वय समिति संयोजक समेत रहेका नगर प्रमुख पूर्णप्रसाद आचार्यको सभापतित्वमा भएको कार्यक्रममा जिल्ला समन्वय समिति बाँकेका उपप्रमुख कार्कीले खोप लगाउने उमेर समुहका कुनैपनि बालबालिका खोपबाट बञ्चित हुन नहुने बताइन् ।

यस्तै नगर प्रमुख आचार्यले खोप सुनिश्चिततालाई दीर्घकालिन बनाउने सवालमा नगरपालिका प्रतिवद्ध रहेको बताए । उनले खोप सुनिश्चिततालाई दीर्घकालिन बनाउन सहयोग गर्ने सम्पुर्ण स्वास्थ्यकर्मीलाई धन्यवाद दिए ।

यसैगरी कार्यक्रममा बोल्दै नगर उपप्रमुख संगीता सुवेदीले खोपको सवालमा नगरपालिकाले प्रभावकारी कार्य गरेको बताइन् । स्वास्थ्य सेवालाई नागरिकमैत्री बनाउने गरि पालिका लागेको उनको भनाई छ । जिल्ला खोप समन्वय समितिले खोप सुनिश्चितता तथा दिगोपना घोषणा गरेकामा कोहलपुर नगरपालिकालाई कदरपत्र सहित सम्मानित गरेको छ ।

स्वास्थ्य कार्यालय बाँकेका खोप फोकल पर्सन नरेश श्रेष्ठका अनुसार अहिलेसम्म कोहलपुर नगरपालिकासहित खजुरा गाउँपालिका, डुडुवा गाउँपालिका र जानकी गाउँपालिकालाई खोप सुनिश्चितता तथा दिगोपना घोषणा गरिएको छ ।

प्रकाशित मिति: शुक्रबार, जेठ २६, २०८० २३:००

प्रतिक्रिया दिनुहोस्