बाँके(गाभर) : राप्ती सोनारी गाउँपालिका वडा नम्बर १ गाभरमा घरको छेउछाउमै आएर पाटेबाघ कराउन थालेपछि स्थानीय बासिन्दा जाग्राम बस्ने गरेका छन् । गाभरस्थित बिद्यालय नजिकैको डाँडोमा आएर बाघ निरन्तर कराईरहेको गाभरकी स्थानीय बासिन्दा हिरा खड्काले जानकारी दिईन् ।
‘बाघ हाम्रो घरको छेउमै आएर कराईरहेका छन्, हामी घर बाहिर निस्कने अवस्था नै छैन,’ उनले भनिन् ‘रातको समयमा हामीलाई शौचालय निस्कन पनि गाह्रो भईसक्यो, बाघको डरले नसुतेरै जाग्राम बसिरहेका छौं ।’ बाघको डरले शनिबार रातभर कत्ति पनि नसुतेको र आइतबार राती पनि जाग्राम बसेको हिराले बताईन् ।
गाउँ नजिकै मध्यवर्ती क्षेत्रमा पर्ने सामुदायिक वनमा भैसी र बाख्रा चराउन गएका बेला शनिबार हिरासहित कालिका खड्का र सेतु ओलीलाई पाटेबाघले घेरा हालेका थिए । बाघबाट जोगिन रुखमा चढेका उनीहरुलाई करिव डेढ घण्टापछि निकुञ्जका हात्तीको सहायताले उद्दार गरिएको थियो । शनिबार भएको उक्त घटनाबाट त्रसित भएका गाभरका स्थानीय बासिन्दा आइतबार पशु चौपाया चराउन जंगल जान सकेनन् ।
तर, पाटेबाघहरु घर नजिकै आएर निरन्तर कराउन थालेपछि आफ्नै घरभित्र पनि डराएर बस्नु परेको हिराले सुनाईन् । ‘आज(आइतबार)दिउँसैदेखी पाटेबाघहरु घर नजिक आएर कराईरहेका छन्, गाडी वालाले पनि दुई वटा बाघले बाटो काटेर गाउँतिर झरेको जानकारी गराए, अस्ति मान्छे खाएको ठाउँ नजिकबाट बाघ स्कुल नजिकको डाँडोतिर उक्लेका रहेछन्, अहिले जता गयो, त्यतै बाघ देखिन थालेका छन्,’ हिराले भनिन् ।
रुखमा चढेर बाँच्न सफल भएका ब्यक्तिले शनिबार जंगलमा ४ वटा बाघ एकै ठाउँमा देखेको बताएका थिए । केहीदिन अघि निकुञ्जले राखेको क्यामेरामा पनि एउटै क्षेत्रमा चार वटा बाघ कैद भएका थिए । रुखमा चढेका मान्छेलाई झम्टिन नसकेपछि बाघले शनिबार बाख्रा र भैसीलाई लखेट्दै तितर-वितर पारेको थियो ।
बाघले शनिबार मान्छेलाई आक्रमण गर्न नपाएपछि ६ वटा भैसीलाई लखेटेको थियो । नदीपारी खर्चे पुगेका ५ वटा भैसीलाई स्थानीयले आइतबार निकुञ्जका हात्तीको मद्दतले घरमा ल्याइएको र एक जिउ राँगो अझै फेला नपरेको हिराले सुनाईन् । ‘निकुञ्जका दुई वटा हात्तीसहित हामीहरु खर्चे गएर ५ वटा भैसी ल्याएर आयौं, हराएको एउटा राँगो चाही फेला परेन, सायद बाघले खायो होला,’ उनले भनिन् । बाघले आतंक मच्चाउन थालेपछि निकुञ्जले गाभरमा माउतेसहित दुई वटा घरपालुवा हात्ती राख्दै आएको छ ।
यो पनि पढ्नुस् :
‘रुखमा चढेका बेला घर परिवारलाई सम्झेर रोइरह्यौंं’
